Espetxe erakundeen aurkako eraso oldea izaten ari da Frantzian

Frantziako Terrorismoaren Aurkako Fiskaltzak jakinarazi duenez, ikerketa bat abiatu dute Estatu osoko hainbat espetxeren inguruetan erasoak eta ibilgailuei su eman dietelako. Are gehiago, Toulongo presondegiaren atarian tiroketa bat izan da.

Erasoak Gerald Darmanin Frantziako Justizia ministroak segurtasun handiko bi espetxe eraikitzeko hartutako erabakiak markatutako testuinguru batean gertatzen ari dira. Bi kartzela horiek uztailerako hexagonoko narkotrafikatzaile nagusietako 100 bat har ditzake. Bruno Retailleau Barne ministroak ere espetxeetako langileen segurtasuna areagotu egingo dela iragarri du.

Azken egunetako espetxeetako funtzionarioen aurkako ekintzetan (gaur goizaldean pintadak aurkitu dituzte horietako baten etxebizitzan, Paris eskualdean) behin eta berriz agertu dira Frantziako Presoen Eskubideen Defentsaren 'DDPF' siglak, joan den astean sare sozialetan sortutako taldea.

Frantziako agintariek gaur baieztatu dutenez, goizaldean erasoak errepikatu dira espetxeetako instalazioen eta langileen aurka, bezperan zazpi kartzela erasotu ostean.

Oraingo honetan, gutxienez hiru ibilgailuri su eman diete gaur goizaldean Tarasconeko espetxeko aparkalekuan, Rodano Ahoak departamenduan. Instalazio horiek bezperan ere antzeko erasoak jasan zituzten, France Info irratiak kontsultatutako Polizia iturriek zehaztu dutenez.

Gainera, goizaldean bertan, Paris inguruko herri batean, susmagarri batek molotov koktel bat jaurti du presondegietako funtzionario bat bizi den eraikinaren sarreraren kontra, eta haren fatxadan presoen eskubideen aldeko lelo bat agertu da idatzita.

"Estatua ezegonkortu nahi duen jendea dago"

Espetxe sistemaren aurkako "indarkeria larria" deitoratu du Darmaninek, eta "Estatua larderiaren bidez ezegonkortu nahi duen jendea" dagoela ohartarazi du.

Europe 1 irratian egindako elkarrizketa batean, Justizia ministroak baieztatu du hiru auto erre dituztela Tarasconen, eta ekintza horren atzean "Estatua ezegonkortu nahi duen jendea" dagoela azpimarratu du.

Zehazki, ministroaren ustez, espetxeetako funtzionarioen aurkako eraso horiekin (azken egunetan erretako auto asko eurenak ziren) Gobernuak "atzera egitea" nahi dute, "narkotrafikatzaileek burdin hesien atzean jarduerarekin jarrai ez dezaten martxan jarri dituen aurrekaririk gabeko neurriak" bertan behera geratzea, alegia.

Ministroak berretsi duenez, "borroka narkotrafikatzaile taldeen aurkakoa da", eta espetxe erregimena gogortzeko politika justifikatu du, beste herrialde batzuetako egoerara ez iristeko; izan ere, "droga-trafikoko sareek espetxeetako funtzionarioen, polizien edo magistratuen aurka egiten dute maiz".

"Ez dugu atzera egingo, Estatuari ez zaiolako mehatxurik egiten", ohartarazi du Justizia ministroak, eta kartzeletan narkotrafikoagatik 17.000 preso daudela gogorarazi du.