Palestinarrak Nakba oroitzen ari dira, eta, bitartean, Israelek Gazaren aurka egiten dituen erasoek etenik ez

Milaka palestinarrek parte hartu dute gaur Zisjordaniako Ramallah hirian deitutako martxa batean, Nakba (hondamendia, arabieraz) gogoratzeko, eta, aldi berean, Gazan bizi den egoera salatzeko. Gutxienez 70 pertsona hil eta dozenaka zauritu ditu Israelek Zerrendaren aurka egindako azken erasoetan, Gazako Osasun Ministerioak azaldu duenez.

"Gure herria hondamendi are larriagoa eta mingarriagoa jasaten ari da gaur Gazako Zerrendan", azpimarratu du Mahmoud Aloul Al Fatahren presidenteordeak. Al Fatahk Palestinar Aginte Nazionala, okupatutako lurralde palestinarretako zati txikietan, gobernatzen du.

Gaur, bonbardaketen abisua emateko alarmak 77 segundoz martxan jarri dituzte okupatutako Zisjordaniako hiri palestinarretan, Nakba hasi zenetik igarotako urte kopuruari erreferentzia eginez.

Nakba Eguna deiturikoa maiatzaren 15ean oroitzen da. 700.000 bat palestinar indarrez deserriratu zituztela gogora ekartzeko data. 1948ko gerra arabiar-israeldarrean milizia sionistek euren etxeetatik bota zituzten. Sei milioi palestinar inguru bizi dira gaur egun Gaza, Zisjordania, Libano, Jordania eta Siriako 58 errefuxiatu-eremuetan.

Bestalde, 200 bat ikasle palestinar eta israeldarrek mobilizazioa egin dute gaur Nakba gogora ekartzeko, Tel Aviveko Unibertsitateko campusetik gertu, nahiz eta asteartean Yoav Kisch Israelgo Hezkuntza ministroak horrelako deialdiak ahalbidetzen dituzten unibertsitateen finantziazioa etetearekin mehatxu egin.

Bien bitartean, Gazan, azken orduotako eraso bortitzenak Jabalian eta izen bereko errefuxiatu-gunean gertatu dira.

Basem Naim Hamasen kideak adierazi du gutxienez 40 hildako izan direla, gehienak emakumeak eta haurrak, eta bideo bat partekatu du, hainbat adingabe gorputegi batean pilatuta agertzen, "ESTATU TERRORISMOA" esaldiarekin batera.

Beit Lahiako ospitalearen arabera (Zerrendako iparraldea), gutxienez 22 adingabe eta 15 emakume dira hildakoen artean.

Israelek eragotzi egiten du lurralde palestinarrean nazioarteko prentsa modu independentean sartzea, eta, beraz, zaila da hildakoen kopurua egiaztatzea, nahiz eta NBEk eta nazioarteko hainbat erakundek sinesgarritasuna eman Gazako Osasun Ministerioak egunero jasotzen dituen zifrei.

Ministerioaren azken zenbaketaren arabera, Israelgo Armadak 52.928 pertsona baino gehiago, gehienak haurrak eta emakumeak, hil ditu Gazan, eta 119.846 zauritu.