Bi ordu baino gutxiago iraun du Errusiaren eta Ukrainaren arteko negoziazio bilerak

Bi ordu baino gutxiago iraun du Ukrainako eta Errusiako ordezkaritzek Istanbulen egin duten batzarrak. 2022tik zeuden bildu gabe, eta gerrari bukaera emateko bideak negoziatzeko asmoarekin batu dira, Anadlu agentzia turkiarrak jakinarazi duenez.

Ordu eta 45 minutura justu-justuan iritsi den hitzorduan, Turkiako Atzerri ministro Hakan Fidfan izan dute bitartekari.

Bilera bukatu berritan, Ukrainako Suspilne telebista publikoak esan du negoziazioak "etenaldian" daudela orain.

Batzarrean, bestalde, gerraren bukaera hizpide hartuta, baldintza zehatza ezarri dio Errusiak Ukrainari: atera ditzala tropak inbasioa hasi zenetik Moskuk anexionatutako lau lurraldeetatik, ukrainar ordezkaritzaren iturri batek Suspline telebista katerari adierazi dionez. Kievek, baina, uko egin dio eskaerari.

Tass albiste agentzia errusiarrak ere eman du gaurko hitzorduaren gaineko informaziorik. Horren esanetan, alde biek erabaki gabe dute oraindik berriro hitz egingo duten ala ez.

Mihail Galuzin Errusiako Atzerri ministrordea, Igor Kostyukov Estatu Nagusiko informazio zerbitzuetako burua eta Aleksander Fomin Defentsa ministrordea ere izan dira batzarrean.

Ukrainako Gobernua ordezkatuz, Defentsa ministro Rustem Umerov, Atzerri ministrorde Sergiy Kyslysya, segurtasun zerbitzuetako buruzagiorde Oleksander Poklad eta espioitza zerbitzuetako buruzagiorde Oleg Lugovski izan dira bertan.

AEBren, Turkiaren eta Ukrainaren arteko topaketa

AEBk, Turkiak eta Ukrainak batzarra egin dute gaur goizean, Errusia eta Ukrainaren arteko negoziazioak abiatu aurretik.

AEBko estatu-idazkari Marco Rubio eta Ukraina eta Turkiako Atzerri ministro Andri Sibiga eta Hakan Fidan izan dira bilera horretan.

Bertako agintarien esanetan, "hiru aldeen arteko negoziazioak hasi dira dagoeneko", eta baieztatu dute Ukrainako goi-kargudunak daudela Turkian, Errusiako ordezkariekin batzartzeko asmorik ez badute ere.