Hadi Matarri 25 urteko kartzela-zigorra ezarri diote Salman Rushdie idazlea hiltzen saiatzeagatik

2022ko abuztuan Salman Rushdie idazlea sastatu zuen Hadi Matarri 25 urteko kartzela-zigorra eta 5 urteko zaintzapeko askatasuna ezarri dizkiote gaur, hilketa saiakeragatik.

David Foley Chautauqua konderriko (New York) Auzitegiko epaileak Fiskaltzak eskatzen zuen zigorrik handiena ezarri dio. Gainera, 7 urteko kartzela-zigorra eta 3 urteko zaintzapeko askatasuna ezarri dizkio, une hartan Rushdierekin zegoen moderatzaileari eraso egiteagatik.

Epaiak aldi berean bete behar dira, bi biktimak gertakari berean zauritu zituelako, Chautauquako konderriko fiskalak argitu duenez; beraz, zigortuak 25 urteko espetxealdia bete beharko du.

Indiar jatorriko idazlea gaur ez da New Yorkeko ipar-mendebaldeko herri txiki horretako epaitegian egon. Erasotzaileak, ordea, adierazpenak egin ditu epaia entzun aurretik.

Matarren ahotan, idazlea "hipokrita" da

Matarrek ez zuen bere burua errugabetzat jo, eta prozesu osoan ez du hitzik hartu. Gaur, ordea, idazlea "hipokrita" dela esan du. "Salman Rushdiek besteei errespetua galdu die (...) Gainerakoak jazarri nahi ditu, eta ez nago horrekin ados", adierazi du.

Rushdiek 1988an argitaratu zuen Bertso satanikoak eleberria, Irango Gobernuak biraotzat jo zuena. Urtebete geroago, Teheranek 3 milioi dolarreko saria eskaini zuen Rushdie hiltzearen truke. Hala ere, Teheranek neurria bertan behera utzi zuen 1998an.

Defentsak uste du epaimahaiak ezin izan duela inpartziala izan

Matarren abokatuak, Nathaniel Baronek, argudiatu du inguruabar horiek guztiek epaiketa nahastu dutela, epaimahaiak ezin izan diolako inpartzialtasunari eutsi.

Auzia bi astean ebatzi dute, eta epaimahaiak bi ordu eskasean adostu du epaia. Prozesuan, Matarren ahotik atera diren hitz bakarrak auzi palestinarraren aldeko aldarrikapenak prentsari helarazteko izan dira.

Ospitaleratuta egon eta sendatu ondoren, Rushdiek Knife (Labana) argitaratu zuen iaz. Bertan, eraso hark nola eragin zion azaltzen du, eta erasotzailearekin gezurrezko elkarrizketa bat mantentzen du.

2022ko abuztuaren 12ko udako egun hartan, Matar Rushdieren hiltzen saiatzeaz gain, Henry Reese ere zauritu zuen, adierazpen askatasunari eta erbestean dauden idazleei buruzko literatur ekitaldi haren aurkezlea.

Hadi Matarrek bide federaletik beste prozesu bat du irekita, Libanoko Hezbollah erakundeari laguntza materiala eman izana leporatuta. Auzi horretan ere, bere burua errugabetzat jo du.