Errusiak gutxienez bederatzi zibil hil ditu Ukrainan, Istanbulgo elkarrizketen biharamunean

Errusiak gutxienez bederatzi zibil hil eta lau zauritu ditu Bilopillia inguruan, Sumy eskualdean, droneak erabiliz autobus baten aurka egindako eraso batean, bertako agintariek jakitera eman dutenez.

"Gaur, Bilopillia hirian, Sumy eskualdean, Errusiaren beste ekintza bortitz beldurgarri bat sufritu dute. Zibilak zeramatzan autobus bati eraso diote. Orain arte bederatzi dira hildakoak, eta lau zaurituak", jakinarazi du Poliziak Telegramen zabaldutako mezu batean.

Bertako hedabideek salatu dute ez dela "bonbardaketa hutsa" izan, Errusiako Armadaren "gerrako krimen ziniko bat" baizik, zibilen aurka jo duelako "berriro", "Nazioarteko Zuzenbidearen eta gizatasunaren arau guztiei jaramonik egin gabe".

Errusiako eta Ukrainako ordezkaritza taldeek lehenengo harreman zuzenak Istanbulen izan eta biharamunean egin dute erasoa. Lehenengo batzar horretatik atera den emaitzetako bat mila gerra-presoren trukea adostea izan da.

Errusiak atea ireki dio goi-bilerari

Kremlinek atea ireki dio gaur Putinen eta Zelenskiren arteko balizko goi-bilerari, "aurreakordioak" adosten badira lehenago, tartean su-etenerako baldintzak. Azken horren harira, datozen egunotan bi ordezkaritzek baldintzak jasotzen dituzten zerrendak trukatuko dituzte.

Dimitri Peskov Kremlinen bozeramaileak ostiralean Istanbulen Moskuko eta Kieveko ordezkaritzek izandako batzarraren ondorioei egin die erreferentzia. 2.000 gerra-preso trukatzeko akordioaz gain, su-etena ezartzeko bete beharreko baldintzen zerrendak trukatzea adostu zuten.

"Su-etenerako baldintzen zerrendak trukatzea adostu dugu. Errusiak bere zerrenda prestatu eta entregatuko dio Ukrainari, eta trukean Ukrainarena jasoko du", adierazi du Peskovek, eta hurrengo batzarrak sekretupean egingo dituztela gaineratu du.

"Ziurrenik ez da iragarri behar zer jasoko duten zehazki. Negoziazioek beren bidea egingo dute, baina ateak itxita izango dira", azaldu du Kremlinen ordezkariak, TASS albiste-agentziaren arabera.

Goi-bilera antolatzea zaila izango omen da, baina ez ezinezkoa: "Bilera hori egin litekeela uste dugu, bi aldeen ordezkaritzen elkarlanari esker, zenbait akordio lortuz gero".

Zelenskik Errusiaren aurkako presio handiagoa eskatu du

Zelenskik, bere aldetik, azpimarratu du Kremlinek su-etena ezartzeko aukera izan zuela Istanbulen, baina ez zuela egin, eta hiltzen jarraitzeko aukerari eutsi ziola horrela.  Horregatik, Errusiari presioa egiteko eskatu dio nazioarteari.

"Atzo, gerra honetako edozein egunetan bezalaxe, su-etenerako akordioa egon zen. Ukrainak denbora asko darama proposatzen: erabateko eta baldintzarik gabeko su-etena bizitzak salbatzeko. Errusiak hiltzen jarraitzeko aukerari bakarrik eusten dio", adierazi du Telegramen.

"Errusiari presioa egin behar diogu sarraskiak amai ditzan. Isun handiagorik gabe, Errusiaren gaineko presio handiagorik gabe, ez da benetako diplomaziarik egongo", nabarmendu du.

Trumpek "nekatuta" ikusten du Putin, eta negoziaziorako tarterik gabe Zelenski

Donald Trump AEBko presidenteak esan du Ukrainako gerrak Putini eta Zelenskiri ere eragin diela, lehena "nekatuta" eta bere irudia narriatuta ikusten duelako, eta bigarrena etengabe laguntza eske ari delako.

"Uste dut Putin nekatuta dagoela honekin guztiarekin, ez du itxura onik", adierazi du AEBko presidenteak Fox telebista-katean.

Putin bakea lortzeko oztopo izan daitekeen galdetuta, Trumpek esan du Zelenski egoera gero eta itogarriagoa luzatzen ari dela. "Gauza bera esaten dut beti hari buruz: ez ditu kartak bere eskuetan. Armada erraldoi baten aurka egiten ari da, eta bere gaitasuna txikitzen da", esan du AEBko presidenteak.

"Zelenski munduko saltzaile onena iruditzen zait. Ni baino askoz ere hobea da. Washingtonera etortzen den bakoitzean 100 milioi dolar eramaten ditu etxera", esan du Trumpek, eta Ukrainari etengabe laguntzen aritzea dirua xahutzea dela berretsi du: "Dirua dirua da. Ez dago amorru gehiago ematen didan gauzarik diru hori guztia xahututa ikustea baino".