Volkswagenen lau zuzendari ohi zigortu dituzte diesel motorren isuri datuak manipulatzeagatik

Braunschweigeko Lurralde-auzitegiak kartzela-zigorra ezarri die gaur Volkswagen konpainiako bi zuzendari ohiri, diesel motorren isuri datuen manipulazioarekin egindako iruzurragatik, eta beste biri baldintzapeko askatasunagatik aldagarriak diren zigorrak ezarri dizkie.

Horrela, Jens Hadler Motorren Garapeneko zuzendari ohiari 4 urte eta erdiko espetxealdia ezarri diote, eta Hanno Jelden goi zuzendariari, berriz, 2 urte eta 7 hilabetekoa.

Volkswageneko zuzendaritza-kontseiluko kide ohi bati, Heinz-Jakob Neusserri, urtebete eta 3 hilabeteko zigorra ezarri dio auzitegiak, baina baldintzapeko askatasunean utzi dute. Identifikatu ez duten beste zuzendari batek urtebete eta hamar hilabeteko zigorra jaso du, eta hori ere aldagarria da.

Auzitegiak frogatutzat eman du akusatuek diesel motorren isuri datuak manipulatu zituztenean milioika kasuen berri zutela.

Manipulazioa legez kanpoko mekanismo baten bidez egin zen, eta horren ondorioz, tailerreko probetan isuriei buruzko datuak askoz txikiagoak ziren autoek kalean benetan sortzen zuten kutsadura baino.

Manipulazioen auzia Alemaniako historia ekonomikoaren eskandalu handienetako bat da.

Manipulazioak 2015ean atzeman zituzten AEBko agintariek. Guztira, Volkswagen konpainiak 30.000 milioi euro baino gehiagoko kalte-ordainak eman behar izan ditu.

2019ko apirilean, Braunschweigeko Fiskaltzak lehen akusazioa aurkeztu zuen.

'Diseselgate' izena hartu zuen eskandaluak, eta prozesuak lau urte iraun du. Epaiketan ingeniarien eta zuzendarien bertsio kontrajarriak izan dira protagonista.

Ingeniariek, datuak manipulatzeko sistema garatu izanaz akusatuta, zuzendariei ondorio juridikoak izan zitzakeela ohartarazi zietela zioten bitartean, zuzendariek zioten inoiz ez zela hitz egin legez kanpoko zerbait edo iruzur-delitua egiten ari zenik.

Zigortutakoek epaiari helegitea jar diezaiokete. Diesel eskandaluarekin lotutako lau auzi zabalik daude oraindik, eta guztira 31 pertsona daude akusatuen aulkian.

Alemaniako DUH gobernuz kanpoko erakundeak deitoratu egin du diesel eskandaluaren lehen epaia hamar urte geroago iristea, eta kritikatu egin du Gobernuak ez duela neurririk hartu manipulatutako 8 milioi ibilgailu inguruk kalean jarraitzea galarazteko.