Israelek Witkoffen azken su-eten proposamena onartu du, eta Hamas aztertzen ari da

Benjamin Netanyahu lehen ministroak Gazan gatibu dauden israeldarren familiei jakinarazi dienez, Israelek Steve Witkoffek, Donald Trump AEBko presidenteak Ekialde Hurbilera bidalitako ordezkariak, aurkeztutako su-eten proposamen berria onartu du, Israelgo komunikabideek gaur jakitera eman dutenez.

Aldez aurretik, Hamas erakunde palestinarrak bitartekarien proposamen berria jaso eta aztertzen ari dela adierazi du.

Palestinako erresistentziak ohar batean azaldu duenez, "Hamaseko buruzagiek Witkoffen proposamen berria jaso dute, eta arduraz aztertzen ari dira", herritarren interesen alde egiteko, "lasaitasuna emateko eta Gazako Zerrendan su-eten iraunkorra lortzeko".

Witkoffek "su-eten proposamen bat" aurkeztu dio Hamasi, "Israelek babestu eta onartu duena", erakunde palestinarrari bidali aurretik, Karoline Leavitt Etxe Zuriko bozeramaileak prentsaurreko batean baieztatu duenez.

"Elkarrizketek aurrera jarraitzen dutela baieztatu dezaket, eta Gazan su-etena lortzea espero dugu, bahitu guztiak etxera itzuli ahal izateko, eta hori Gobernuaren lehentasuna izan da hasieratik", gaineratu du.

60 eguneko menia

Witkoffek asteazkenean Washingtonen azaldu zuen proposamen berri bat aurkeztuko zuela, eta aldeek onartuko zutela uste zuela adierazi zuen, baldintzak zehaztu gabe, nahiz eta hedabide israeldar eta arabiar batzuek 60 eguneko su-etena dela argitaratu.

Su-eten horrek 10 gatibu israeldar bizirik eta 18 hildako askatzea ekarriko luke su-etenaren lehen eta zazpigarren egunetan, ehunka preso eta atxilotu palestinarren truke.

Hasieratik ez litzateke hitzartuko Israelen erasoen amaiera

Su-eten iraunkorra negoziatzea eta tropa israeldarrak erretiratzea ere bai; beraz, hasieratik ez litzateke hitzartuko Israelen erasoen amaiera, Hamasek eskatu izan duen bezala.

Komunikabideetan argitaratutako proposamenak jasotzen du, halaber, laguntza humanitarioa banatuko dela akordioa sinatzen den unetik, tropa israeldarrak lehen eta zazpigarren egunean berriz bikokatzea, eta Hamasek gainerako gatibuen bizitza eta heriotza frogak eman behar dituela hamargarren egunean.

Negoziatzen den bitartean, sarraskiak eta okupazioak jarraitzen dute

Egipton negoziazioak jarraitzen duen bitartean, gutxienez 23 palestinar hil ditu gaur Israelek Al Bureijeko errefuxiatu-eremuan, Gazako Zerrendaren erdialdean.

Israelen ehiza-hegazkinek egindako bonbardaketak Al Qurnawi familiaren etxea eraitsi du, eta dozenaka zauritu eragin ditu, Al Aqsako ospitaleko iturriek jakitera eman dutenez.

Gazako iturri medikoen arabera, gauerditik gutxienez Armada sionistak 37 pertsona hil ditu erasoetan; behin-behineko kopurutzat jotzen dute hori, hondakinen azpian gorpuak baitaude oraindik.

13 urteko haur bat ere hil dun Israelek Deir al Balahn errefuxiatuak hartzen zituen kanpin-denda baten aurka egindako erasoan, Wafa Palestinako albiste-agentzia ofizialaren arabera.

2023ko urritik, Israelek 54.000 palestinar baino gehiago hil ditu, gaixotasunagatik eta zeharkako arrazoiengatik hildako milaka lagunen estimazioa kontuan hartu gabe, Gazako Osasun Ministerioko datuen arabera. Gainera, 123.500 pertsona inguru zauritu dituzte Netanyahuren soldaduek.

Bestalde, Israelgo Armadak Gazako Zerrendaren erdialdean dagoen Nuseirateko errefuxiatu-guneko herritarrei bertako hiru eskoletatik urruntzeko agindua eman die.

Gainera, Israelek NBEko agentziei Gazan edozein laguntza humanitario banatzea galarazi die azken hiru egunetan, Stephane Dujarric NBEko idazkari nagusiaren bozeramaileak gaur salatu duenez.

Laguntzaz betetako 600 kamioi daude Kefer Shalom pasabidearen alde palestinarrean, eta ezin dira biltegietatik atera segurtasun ezagatik; bitartean, NBE etengabe eztabaidatzen ari da agintari israeldarrekin, laguntza banatzeko baimenik lortu ezinik.

Azkenik, Israelgo Gobernuak baieztatu du 22 kolonogune ezarriko dituela Zisjordaniako hainbat tokitan. Iragarpena gaur egin du Bezalel Smotrich Israelgo Finantza ministroak. Peace Now gobernuz kanpoko erakundeak adierazi du 1993tik Tel Avivek hartu duen neurririk kolonialistena dela. Hain zuzen ere, urte horretan hartu zuen Israelek behin eta berriz urratu duen konpromisoa, legez kanpoko kokaleku gehiagorik ez ezartzeko.