Egiptok Gazaren aldeko martxan joatekoak ziren 200 ekintzaile pasa atxilotu ditu, tartean hainbat euskaldun

Egiptoko indar armatuek Gazaren aldeko Mundu Martxan parte hartzera zihoazen 200 aktibista baino gehiago atxilotu edo atxiki ditu azken orduotan. Martxa horrek Israelek Gazan laguntza humanitarioa sartzeko ezarritako blokeoa amaitzea du helburu.

30 bat lagunek osatutako ordezkaritza bat joan da Euskal Herritik eta horietako 5 eta 10 artean atxikita daudela baieztatu dio Maite Gartzia Podemos Ahal Duguko kideak EITBri. Gartzia bera Kairon da, Podemoseko beste hainbat kiderekin batera, martxan parte hartzeko asmotan joana. Azaldu duenez, atxiloketak inongo indarkeriarik gabe egin dira eta onik daude Euskal Herritik hara joandako guztiak. 

Atxilotutako gehienak frantsesak dira (52), algeriarrak 40 eta badira Maroko edo Libiako pertsonak ere atxilotuen artean. Hoteletan eta Kairoko aireportuan atxilotu dituzte eta batzuk dagoeneko euren herrialdeetara deportatu dituzte.

Asteazken eta ostegun artean mobilizazioan parte hartzera doazen 80 herrialdetako 4.000 lagun Kairora iristea espero da. 

Martxaren koordinatzaileek atxilotuak berehala askatzeko eskatu diote Egiptori, bai eta martxan parte hartu nahi duen orori sartzen uztea ere. Izan ere, diotenez "martxaren helburuak bat datoz erabat Egiptok berak blokeoarekin amaitu eta mugetan egonkortasuna berreskuratzeko erakutsi izan duen interesarekin". 

Ostegun honetan Radio Euskadin egindako elakrrizketan, Pablo Bustinduy Eskubide Sozial, Kontsumo eta 2030 Agendaren Espainiako ministroak "kezka handia" agertu du atxiloketen harira eta eskerrak eman dizkie "gobernuak egiten ari ez direna egiten ari diren mundu osoko aktibistei, hau da, Israelgo Estatuaren gaineko nazioarteko presio politikoa, diplomatikoa, ekonomikoa eta komertziala areagotzea, genozidio jasanezin honi amaiera emateko". 

Martxak Egipto eta Gaza arteko mugan dagoen Rafah-ko pasabidera datozen egunetan iristea du helburu. Egiptoko Atzerri ministerioak, ordea, argi utzi du Martxa hori egin ahal izateko "baimena beharrezkoa" dela eta soilik bide ofizialak jarraituta lortu ahalko dela. 

Gazaren aldeko Mundu Martxaz gain, martxan da beste kanpaina bat ere, joan den igandean Algeriatik abiatu zena, Egiptorantz. 

Martxa ostiralean abiatzekoa da

Mundu osotik iritsitako aktibistek hilaren 13an abiatu asmo dute konboia Kairotik Al Arish-era, Sinai iparraldeko hiriburura. Handik hiru egunez oinezko martxa egin asmo dute Rafah-ra eta, behin hara iritsita, 72 orduko kanpaldia aurreikusi dute, Kairora itzultzeko gero.

Sinai iparraldea sartzea debekatuta dute atzerritarrek, ez bada agintariek propio emandako baimenarekin. 

Mundu Martxa honek, joan den astelehenean Israelek bahitutako Askatasunaren Ontzidiak bezala, Israelek Gazan oinarrizko lehengaiei (janaria edo erregaia, besteak beste) ezarritako blokeoa salatzea du helburu.