Israelek Teherango hainbat auzo eta toki bonbardatu ditu, tartean Ilargi Gorriaren eraikin bat

Israelek eraso berri bat egin du gaur Irango hiriburuaren aurka, eta Teherango hainbat toki bonbardatu ditu, tartean Ilargi Gorriaren eraikin bat.

Press TV Estatuko telebistak Irango Ilargi Gorriaren (IRCS) eraikinaren irudiak erakutsi ditu, kearekin eta sarrera erabat txikituta agertzen den argazki batekin.

Era berean, hiriburuaren ekialdean eta ipar-ekialdean dauden auzoetan leherketak izan dira. Iran Nuances atariak jakinarazi duenez, Israelek Karaj kanpoaldean (Teheranen alboan) dagoen Payam aireportutik gertu dauden eremuak ere bonbardatu ditu.

Bestalde, Israel Katz Defentsa ministroak gaur jakitera eman duenez, Aire Armadako hegazkinek "Irango erregimenaren barne segurtasun egoitza suntsitu dute". "Irango diktadorearen beso errepresibo nagusia da", erantsi du Katzek.

Tehran Times egunkariak jakitera eman duenez, gutxienez 61 drone, munizio eta gurutze-misil israeldar suntsitu ditu gaur goizetik Irango Armadak.

Horrela, Israelen eta Iranen arteko gatazkak jarraitzen du gaur, Armada sionistak Irani eraso egin zionetik bonbardaketen seigarren eguna dute bi aldeek. Dagoeneko Israelek 200 pertsona baino gehiago hil ditu Iranen, tartean Irango buruzagi militarrak eta segurtasuneko kideak.

Joan den ostiral goizaldean Israelek Iranen aurkako erasoa hasi zuenetik, Teheranek 400 misil balistiko eta ehunka drone jaurti ditu Israelen aurka, Tel Aviveko Gobernuaren azken datu ofizialen arabera.

Iranen erasoek 24 pertsona hil eta 800 baino gehiago zauritu dituzte Israelen, horietatik zortzi oso larri eta 41 larri, eta 755ek zauri arinak izan dituzte.

Bestalde, Irango agintariek gaur ziurtatu dutenez, Israelgo Aire Armadako beste F-35 hegazkin bat bota dute Teheran hiriburutik hego-ekialdera, eta beste drone bat Isfahandik gertu. Orain arte, Irango agintariek iragarridute bost F-35 bota dituztela, eta esan dute gutxienez bi pilotu lurrean atxilotu dituztela.

Donald Trump AEBko presidenteak "baldintzarik gabe errenditzea" eskatu zion asteartean Errepublika Islamikoari, eta Ali Khamenei Irango buruzagi gorena non dagoen badakiela adierazi du, baina oraingoz ez duela hiltzeko agindurik eman.

Khameneik, bestalde, gaur AEBri ohartarazi dio "kalte konponezina" jasango duela bere herriaren aurka eraso egiten badute, eta Iranek amore emango ez duela ziurtatu du.

Mosadeko ustezko agenteen atxiloketak Iranen

Azkenik, Irango agintariak hainbat operazio egiten ari dira azken egunotan inteligentzia zerbitzu israeldarren (Mosad) ustezko agenteen aurka. Atxiloketa ugari egin dituzte, eta droneak ekoizten zituen tailer bat desegin ere.

Dozenaka pertsona atxilotu dituzte astelehenetik, eta Israel ustez Iranen erasoak egiteko ekoizten ari ziren armak, lehergaiak eta droneak ere atzeman dituzte, Irango hainbat hedabidek jakitera eman dutenez.

Mohammad Bagher Ghalibaf Irango Parlamentuko bozeramaileak astelehenean adierazi zuenez, Israelek ostiral goizaldetik egiten dituen eraso gehienak ez dira zuzeneko erasoak, baizik eta "barne infiltrazioaren laguntzarekin" egiten ari direnak. Horregatik, Israelera misilak jaurtitzeaz gain, Iran bere lurraldean “traidoreak” bilatzen eta defentsak indartzen ari da.