Gazan hildakoen kopurua gora egiten ari denean, su-eten akordioa "datorren astean" lor litekeela esan du Trumpek

Donald Trump AEBko presidenteak ostiral honetan iradoki duenez, baliteke "datorren astean" Gazako Zerrendan Israelen eta Hamasen arteko su-etena iragartzea. Martxoan Israelek hautsi zuen aurreko akordioa eta AEBk erabaki hori babestu zuen orduan. Bitartean, hildakoen kopurua gero eta handiagoa da Gazan; bart 50 gazatar gehiago hil ditu Israelek.

"Inplikatutako pertsona batzuekin hitz egin berri dut", esan zuen ostiralean Trumpek Bulego Obalean kazetarien galderei erantzunez. Gazako egoera "izugarria" dela onartu zuen, eta "arrazoi humanitarioak" argudiatu zituen esku hartzeko. 

Horren harira, ontzat jo du Gazan laguntza banatzeko ezarri den sistema; izan ere, Trumpen hitzetan, "ustez herritarrak zaindu behar dituztenak (Hamas) janaria lapurtzen eta saltzen ari dira". Argudio horrekin berarekin justifikatzen du Israelek ere laguntzaren banaketa Gazako Fundazio Humanitarioak koordinatzea, NBEk eta gobernuz kanpoko erakundeek egin beharrean.  

Hain zuzen ere, Trump sistema hori defendatzen ari zen bitartean, Antonio Guterres NBEko idazkari nagusia hura salatzen ari zen, sistema hori "jendea hiltzen" ari delako. New Yorken NBEren egoitzan egin zuen hitzartzean, Guterresek esan zuen NBEk bere gain hartu behar duela berriro laguntza humanitarioa banatzeko ardura. "Pertsona batzuk hiltzen ari dira beren familiak elikatzen saiatzeagatik. Janaria bilatzeak ez luke inoiz heriotza-zigorra izan behar", adierazi zuen Guterresek.

Gazako agintarien arabera, 500 pertsona baino gehiago hil dira banaketa-zentro horietan, gehienak Israelgo indarrek egindako tiroen ondorioz.

Gaza: 50 hildako egun osoan

Beren bizitza eta patuari buruzko erabakiak hartzen diren bulegoetatik urrun, gazatarrek okupazioko indarren etengabeko eraso indiskriminatua jasaten jarraitzen dute egunak joan eta egunak etorri.

Bart, 50 pertsona hil dituzte, haurrak tartean, Zerrenda osoko zenbait tokitan. 11 pertsona hil dituzte Khan Yunisen, kanpin-denda batean lo zeuden hiru anaia tartean; familia bereko bi kide hil dituzte Deir el Balahn; bi haur hil dituzte Jabaliako etxebizitza baten aurkako eraso batean; 31 palestinar hil dira Israelen bi erasotan, Al Tufa auzoko azoka txiki batean eta eskola batetik gertu; eta beste bat Rafahn, laguntza humanitarioa banatzeko zentrotik gertu. 

Genozidioan adituek eta giza eskubideen aldeko taldeek salatu dutenez, garbiketa etnikoa egiteko gerra honek 56.300 hildako baino gehiago utzi ditu jada, eta 100.000 inguru dira zaurituak, Gazako Osasun Ministerioaren arabera. 

Hala eta guztiz ere, hildakoen benetako kopurua datu ofizial hori baino % 40 handiagoa izan daiteke, Khalil Shikaki politologo palestinarrak gidatutako ikerketa independente baten arabera.

Ikerketa hori egiteko, Gazako 2.000 etxebizitzatan egin dituzte galdeketak, ia 10.000 biztanleko lagina baliatuta, eta 2025eko urtarrilera arte Gazan Israelen erasoetan 75.200 pertsona hil dituztela ondorioztatu dute. Gorpu asko Gazako agintariek jakinarazi gabe lurperatu dituztela uste dute, edo hondakinen artean harrapatuta jarraitzen dute.