Global Sumud Flotilla: "Misioak aurrera jarraituko du", bart Tunisian jasandako erasoa gorabehera

Global Sumud Flotillaren ordezkariek berretsi dute bart erasoa jasan dutela Tunisian porturatutako ontzietako baten aurka, eta drone bidezko erasoa izan dela. 

Mugimenduak Tunisiatik egin duen prentsaurrekoan Thiago Avila ekintzaileak adierazi duenez, erasoa gorabehera, "misioak aurrera jarraituko du".

Gogorarazi duenez, "Gazaren kontrako legez kanpoko blokeoak 17 urtez daramatza ezarrita", eta aldi horretan "37 ontzi atzeman edo jazarri" dituzte. "Erasoren bat jasan duen 38. ontzia da hau", deitoratu du.

Hala ere, azpimarratu nahi izan du ekimena martxan dagoela, baina ez flotillari esker: "Ez gara gu historia honen muina, Gazako herri palestinarra baizik; zortzi hamarkadatan genozidioa eta garbiketa etnikoa jasan duena, sionismoa izeneko ideologia arrazista eta supremazistak gidatutako apartheid Estatu kolonial batek egituratuta", adierazi du.

"Bart gertatu denak munduari erakusten dio nori egiten diogun aurre: Gazan goseak dauden haurrei laguntza humanitarioa ematea galarazi nahi duen norbaiti, osasun langileak, Nazio Batuetako langileak, Babes Zibileko langileak eta kazetariak hiltzen aritu denari, gerra krimen horiek guztiak egiten aritu denari", adierazi du.

Horren harira, onartu du "arrisku handiko misioa" dela, baina "ezer gutxi" dela "palestinarrek egunero Gazan pairatzen duten arriskuarekin alderatuta". "Beraiek (Israelgo Indarrek) droneak, indarkeria eta armak dituzte. Guk gainerako guztia daukagu. Historia gure alde dugu", esan du. "Palestinako herriak ez du inoiz amore emango, ezta guk ere", gaineratu du.

Gaueko erasoa flotillari

Sidi Bou Said Tunisiako portuan (ipar-ekialdeko kostaldea) atrakatuta dagoen Sumud Flotillako ontzi nagusietako batek salatu duenez, drone batek eraso egin dio, ontziko tripulatzaileek baieztatu dutenez.

"Global Sumud Flotillak baieztatu du bere ontzi nagusietako baten kontrako erasoa egin dutela, 'Familiaren Itsasontzia' izenekoaren kontra, alegia, Zuzendaritza Batzordeko kideak zeramatzana, eta, susmoa da drone bat izan dela", adierazi dute X sare sozialean.

Flotillako kideek prentsaurrekoa egingo dute 11:00etan (Euskal Herriko ordua) erasoaren xehetasunak emateko.

Zehaztu dutenez, itsasontzia Portugalgo bandera darama, eta "bidaiari guztiak eta tripulazioa salbu daude"; era berean, azpimarratu dute horrelako erasoak "beldurtzeko eta asmoa zapuzteko" egiten dituztela, eta ez dutela ekimena geldiaraziko.

Saif Abukeshek GSFren Espainiako koordinatzaileak adierazi duenez, bi espainiar daude, une horretan ontzian ez zeuden arren: Ada Colau Bartzelonako alkate ohia eta Abukesh bera.

Tunisian zeuden ontzidiko bozeramaileen arabera, suteak "ez ditu kalte handiak eragin, azalekoak baizik", eta ontzi horrek asteazkenean "bidaiatzeko moduan egongo da".

Hala ere, Tunisiako Guardia Nazionalaren Zuzendaritza Nagusiak ohar bidez gezurtatu du ontziari "drone batek" eraso egin izana.

Tunisiako agintarien arabera, sutea "ontzi horretako salbamendu-txalekoetan piztu zen" eta "pizgailu edo zigarrokin batek eztanda egin zuen".

Guardia Nazionalak igorritako oharrean adierazi duenez, "ez da ez aurkako ekintzarik ez kanpoko erasorik egin".

Hala ere, minutu batzuk geroago, flotillak bideo bat argitaratu du sare sozialetan, "ontzia goitik jo duen une zehatza" erakusten duena.

Irudiek erakusten dutenez, su-bola moduko bat goitik behera erori, ontzia jo eta sutea eragin zuen.

Oraingoz, ez dago baieztapen ofizialik Greta Thunberg aktibista suediarra, ontzidiko tripulazioaren parte dena, ontzian zegoen ala ez jakiteko.

Bestalde, Francesca Albanese NBEk lurralde palestinar okupatuei buruz duen kontalariak ere baieztatu du erasoa, eta "beste bi flotilla Tunisiara doazela eta premiazko babesa behar dutela" gaineratu du.

Gertaeraren berri izan ostean, ehunka tunisiar Sidi Bou Said portura joan dira goizaldean, munduko flotillari elkartasuna adierazteko, sareetan zabaldutako bideoetan ageri denaren arabera.

Protestariek "Gora, gora Palestina" eta gisako oihuak bota dituzte.

X sare sozialean argitaratu duten bideo batean ageri dira itsasontziak jasandako kalteak.

Jaurlaritzak elkartasuna adierazi du

Bestalde, Eusko Legebiltzarrak babesa erakutsi dio drone bidez eraso duten Askatasunaren Flotillari. Palestinari eta Ekialde Hurbilari Laguntzeko Taldearteak ohar bidez gogorarazi duenez, mundu osoko portuetatik joandako ehunka ekintzailek bat egin dute ekimenarekin, "Israelen setioa apurtzen saiatzeko, eta, herri palestinarrak pairatzen duen genozidioari amaiera emateko helburuz, itsas korridorea ireki ahal izateko".

Legebiltzarreko lantalde horrek iragarri duenez, gertutik jarraituko du "mundu-mailako ekimen garrantzitsu hori", eta ontziak helmugara iristeko itxaropena agertu du. "Palestinako herriari elkartasuna adierazi nahi diogu berriz ere, eta Palestinaren aldeko ekimen guztiak txalotzen ditugu", gaineratu du taldeak.