Boliviak aro berri bat abiatuko du gaur, hauteskundeen bigarren itzulia eginda

Bolivian hauteskunde eguna dute gaur, historian lehen aldiz presidentea eta presidenteordea aukeratzeko, Rodrigo Paz senatari zentristak eta Jorge Quiroga agintari kontserbadore ohiak jokatuko duten bigarren itzulian.

Paz eta Quiroga izan ziren bi hautagai bozkatuenak abuztuaren 17an egindako hauteskunde orokorretan, eta Boliviako Parlamentua berritu zuten hurrengo bost urteetarako, baina inork ez zuen lortu lehen itzulian garaile izateko adina babes.

Abuztuko bozketan, Alderdi Demokrata Kristauak (PDC) aurkeztutako senatari zentristak botoen % 32,06 lortu zituen, eta presidente ohi kontserbadoreak, Aliantza Librea ordezkatuz, % 26,70.

Bigarren itzulia 2009tik indarrean dagoen Konstituzioan sartu zuten. Horren arabera, "Presidentetza eta Presidenteordetza aitortuko zaio hauteskunde zerrenda irabazleari", baldin eta baliozko botoen % 50 baino gehiago lortzen baditu, edo gutxienez botoen % 40 jaso eta hurrengoari gutxienez 10 puntuko aldea ateratzen badio.

2025eko urriaren 19an lehenengoz erabiliko da mekanismo hori presidentea eta presidenteordea hautatzeko, eta "botoen gehiengoa" lortzen duen binomioa  izango da irabazle.

Inkestek Quiroga jotzen dute faborito, baina Pazek zalantzan jarri du ikerketa horien balioa, lehen itzulian hasiera batean azken tokietan utzi zutelako.

Bi hautagaiek berehalako ekintzak agindu dituzte Bolivia krisi ekonomikotik ateratzeko. Quirogak dolarrak sartuko ditu, Nazioarteko Diru Funtsaren (NDF) bitartez, eta Pazek hornidura arazoari konponbidea emateko erregaiak lortuko dituela hitzeman du.

Biak bat datoz Estatua txikitzeko helburuan, eta horrek Sozialismorako Mugimenduak (MAS) 20 urtez mantendu duen eredu ekonomikoa aldatzea ekarriko du.

Bolivian botoa ematea derrigorrezkoa da, eta botoa eman ostean, ziurtagiri bat jasotzen dute, hauteskundeak izan eta hurrengo 90 egunetan erakunde publikoetan eta bankuetan edozein izapide egiteko aurkeztu beharrekoa.