Egiptoko Museo Handiaren inaugurazioa, "aurrekaririk gabeko ekitaldi historikoa"

Zibilizazio bakar bati eskainitako munduko gune arkeologikorik handiena, Egiptoko Museo Handia (GEM, ingelesezko sigletan), inauguratuko da larunbat honetan, azaroaren 1ean, eta Egiptok irrikaz begira dago Gizako ordokian piramideetatik bi kilometro eskasera dagoen eraikin ikusgarrira.

Gizako piramideen oinetara, Niloren mendebaldeko ertzean dagoen 50.000 metro karratuko eraikin-multzoan miretsi eta aztertu ahal izango den 100.000 pieza baino gehiagoko bilduma erraldoian nabarmentzekoak izango dira Tutankamonen urrezko maskara eta Ramses II.aren koloso handia.

"Aurrekaririk gabeko gertakari historikoa" da, bai herrialdearentzat, bai kultura unibertsalarentzat, arabiar herrialdeko agintarien arabera. 

Mundu osoko ehunka telebista-kate, Interneteko plataforma eta sare sozial, TikTok (ekitaldiaren babesle nagusietako bat) besteak beste, bertan izango dira, ekitaldia zuzen-zuzenean eskaintzeko. Horren edukirik, baina, ez dute aurreratu. 

Egiptok mundura zabaldu nahi du bere irudia, eta Egiptoko Museo Handia turismoa eta ospea erakartzeko gune bihurtu. Aurreikuspenen arabera, urtero 5 milioi bisitari erakarriko ditu, Egipto turismo kulturalaren erreferentzia gisa finkatzeko, horren mende baitago, neurri handi batean, herrialdearen ekonomia.

Bi hamarkada baino gehiago behar izan dira Egiptoko Museo Handia gauzatzeko, lanak asko luzatu baitira iraultza, pandemia eta krisi ekonomikoen ondorioz. 1.200 milioi dolarreko inbertsioa behar izan da eraikitzeko. Eraikinak triangelu-forma du, eta Keops eta Mikerinosen piramideetara bideratuta dago. Askok pozik hartu dute, ingurumenaren aldetik arduratsua izateaz gain, diseinu berritzailea baitu eta milaka urte dituzten artelanak zaindu eta erakusteko estandar gorenak izan baititu kontuan.

Tutankamonen maskara eta askoz gehiago

Egiptoko Museo Handiak 100.000 pieza baino gehiago bilduko ditu, 7.000 urteko historia hartzen dutenak, Egipto predinastikotik hasi eta greko-erromatarren garaira arte. Horietako 20.000 inoiz jendaurrean erakutsi gabekoak izango dira. 

Museoaren erakargarritasun nagusien artean, Tutankamonen objetu-sorta erraldoia dago: 5.398 objektu. Horiek guztiak 7.500 metro koadroko espazio bakar batean bildu dira, faraoi-haurrari eskainitako eremu ikusgarrian. Tutankamonen maskara da, zalantzarik gabe, Egiptoko Museo Handiaren pieza nagusia. Bertan ikusi ahal izango dira, gainera, zeremonia-gurdia, bere hiru sarkofagoak —horietako bat 110 kilo urrez egina—, errege-tronua, bitxiak, sandaliak eta errituak egiteko altzariak, besteak beste.