AEBk eta Iranek gerrari amaiera emateko akordioa lortu dute
Washington eta Teheran artean bitartekari lanetan aritu den Shehbaz Sharif Pakistango lehen ministroak baieztatu du akordioa indarrean dagoela eta iragarri du ekainaren 19an sinatuko dutela, Suitzan. Momentuz, ez dute testua ofizialki ezagutzera eman eta alde bakoitzak interesatzen zaizkion alderdiak nabarmendu ditu.
Persiar golkoak erasotutako petroliontzi bat. Artxiboko irudia: Reuters
Ameriketako Estatu Batuek eta Iranek akordioa itxi zuten igandean duela hiru hilabete baino gehiagotik Ekialde Hurbilean piztuta dagoen gatazkari amaiera emateko eta Ormuzeko itsasartea berriz irekitzeko.
Shehbaz Sharif Pakistango lehen ministroak, Washingtonen eta Teheranen arteko bitartekari lanak egin dituenak, akordioa baieztatu du, eta jakinarazi du sinadura ofiziala ekainaren 19an egingo dutela, Suitzan.
Akordioaren helburua da eskualdean krisi larria eragin duen gerrari amaiera ematea. Gatazkak eragin handia izan du nazioarteko energia-merkataritzan ere, Ormuzko itsasartea itxita egon delako; izan ere, munduan kontsumitzen den petrolioaren % 20 inguru igarotzen da handik.
Ormuz berriz irekitzea
Adostutako ulermen memorandumaren xehetasunak ez dira ofizialki jakitera eman. Alabaina, alderdi bakoitzak gehien interesatzen zitzaizkion puntuei buruzko informazioa eman du.
Hala, Donald Trump AEBko presidenteak akordioa txalotu du, eta eskualdean merkataritzaren eta petrolioaren fluxu normala berrezartzea ahalbidetuko duela adierazi du.
Truth Social sare sozialean argitaratutako mezu batean, Trumpek adierazi du akordioak aurreikusten duela Ormuz itsasarte estrategikoa bidesaririk gabe berriz irekitzea eta, era berean, AEBk Irango portuen gainean ezarritako itsas blokeoa berehala kentzea.
Halaber, JD Vance AEBetako presidenteordeak jakitera eman duenez, adostutako elkar ulertzeko memoranduma igandean sinatu zen digitalki, aurrez aurreko sinaduraren zain, datorren ostiralean.
Iranen aurkako zigorrak kentzea
Bestalde, Irango buruzagi gorenak, Mojtaba Khamenei aiatolak, adierazi du Irango herritarrak direla gatazka honen "garaileak, zalantzarik gabe". Ismail Bagaei Irango Atzerri Ministerioko bozeramaileak adierazi duenez, akordioak blokeatutako aktibo irandarrak askatzea eta Errepublika Islamikoaren aurkako zigor guztiak kentzea aurreikusten du, eta, aldi berean, Teheranen subiranotasuna "bermatzen" du Ormuzeko itsasartean.
Iranen aburuz, gainera, akordioak Libanon su-etena dakar. Hain zuzen ere, Hezbollahk eskerrak eman dizkio Teherango erregimenari Libano akordioan sartzeagatik. Hala ere, AEBko goi funtzionario batek adierazi du Israel Libanotik erretiratzea ez dela memorandumaren parte.
Trump eta Iran, protagonista G7an
Iranen eta AEBren arteko akordioa izango da, zalantzarik gabe, astelehen arratsaldean Frantzia ekialdeko Evian-les-Bains herriko bainuetxean hasi den G7ko buruzagien goi-bileran jorratuko den gai nagusia.
Etxe Zurian UFCko arte martzialean borroka batekin bere 80. urtebetetzea ospatu ostean, joan da Donald Trump Frantziara. Heltzean, Emmanuel Macron presidentearekin aldebiko bilera bat izan du eta komunikabideen aurrean adierazi du Ormuzeko itsasartea "ostiraletik aurrera erabat irekita" egotea espero duela.
G7-KO GOI-BILERA
Trumpek, G7ra iritsi berritan: "Ostiraletik aurrera Ormuz erabat irekita egotea espero dut"
G7aren goi-bileran parte hartzen ari diren liderrak Evian-les-Bains Frantziako herrian daude jada. Lurreratu bezain laster, AEBko presidente Donald Trumpek eta Emmanuel Macron Frantziako liderrak aldebiko bilera egin dute. Iranekin lortutako akordioa izan da gai nagusietako bat.
Europaren eta munduaren erreakzioak
Munduko gobernu eta erakundeen erreakzioak ez dira zain egon. Ekialde Hurbileko herrialde gehienak baikor agertu dira, nahiz eta Israelek -gerran parte hartzen du Libanoko frontean- akordioa errefusatu duen eta ez dituela tropak erretiratuko adierazi duen.
Europan, aldiz, Frantziako, Erresuma Batuko, Alemaniako eta Italiako gobernuek "poz handiz" hartu dute Estatu Batuen eta Iranen arteko "ulermen memoranduma" iragarri izana. Era berean, "premiazkotzat" jo dute Ormuzko itsasartea berriro irekitzea, nabigazio-askatasun "baldintzarik eta murrizketarik gabekoa" bermatzeko.
Espainiako Gobernuko Atzerri Gaietarako ministroak, Jose Manuel Albaresek, ongietorria eman dio bake-akordioari. Albaresek, X sare sozialean duen profilaren bidez, "bitartekarien ahaleginak" ere eskertu ditu, eta azpimarratu du "Ormuzko itsasartetik nabigazio aske eta segurua funtsezkoa" dela.
Zure interesekoa izan daiteke
AEBk eta Saudi Arabiak Iranen aldeko miliziei eraso egin diete Iraken, drone bidezko eraso baten ondoren
Bonbardaketek Herri Mobilizazioaren Indarretako 20 kide hil eta 32 zauritu dituzte gutxienez, eta Irakek larrialdiko bilera deitu du tentsioak gora egin duelako.
Fujimorismoa itzuli da: Keiko Fujimorik presidente karguaren zina egin du
Alberto Fujimori presidente ohiaren (1990-2000) alabak laugarren saiakeran lortu du presidente izatea. Aurreko hauteskundeetan bigarren itzulian galdu zuen. Azken hamarkadan herrialdeak bizi izan duen ezegonkortasun politikoari aurre egin beharko dio, eta gobernatzeko akordioak lortu beharko ditu, ez baitu eta gehiengo osorik. Gainera, Keiko Fujimorik Trumpengana gerturatzeko asmoa duela iragarri du, eta horrek aldaketa ekar dezake politikan, Peruko ekonomiaren bazkide nagusia Txina baita.
Girondako sutea berraktibatu da fokuetako batean, eta beste 4.000 turista ebakuatu dituzte
Sutea gaur gauetik dago egonkortuta, baina agintariak fenomeno meteorologiko kaltegarrietarako prestatzen ari dira. Puntu horietako bat berriro aktibatu da haizearen norabidea aldatu da eta.
Gutxienez 18 hildako eta dozenaka zauritu utzi ditu Japon hego-mendebaldea astindu duen 7,1 indarreko lurrikarak
Kumamotoko merkataritza-gune batean leherketa izan da, eta baliteke hildako gehiago egotea. Tsunami alerta bertan behera utzi dute.
15 urteko mutil bat atxilotu dute Seattleko tiroketarekin lotura duelakoan
Gutxienez hiru pertsona hil eta lau zauritu ziren gastronomia-jaialdi ezagun batean izandako tiroketan. Poliziak bigarren susmagarri baten bila jarraitzen du.
Macronek iragarri du Landetako sutea "kontrolpean" dagoela, baina Girondakoak "oso gogor" jarraitzen duela
Girondako departamenduan piztutako sutearen harira, Eliseoko buruak esan du "borrokan" jarraitzen dutela. "Egonkortu egin da, gutxigorabehera, baina oso gogorra izaten jarraitzen du, eta oso zuhurrak izan behar gara datozen orduetan eta egunetan", ohartarazi du.
Iranen aurkako bonbardaketak gelditzeko agindu du Trumpek, akordio bat negoziatzeko
Hala ere, ohartarazi du erasoei berriro ekingo diela elkarrizketek porrot egiten badute.
Gutxienez hiru pertsona hil eta lau zauritu dira tiroketa batean Seattle hirian
Tiroketa gastronomia jaialdi batean gertatu da. Alkatearen arabera, pertsona bat atxilotu dute gertaerarekin lotura duelakoan.
Kolonoek izua zabaltzen jarraitzen dute, Israelgo Gobernuak Zisjordaniaren aurkako setioa larriagotzen duen bitartean
Israel Katz Israelgo Defentsa ministroak iragarri du "terrorismoaren aurkako" operazioak datozen asteetan ere luzatuko direla. Palestinako Aginte Nazionalak "premiazko nazioarteko interbentzioa" eskatu du.
Girondako suteak 240 etxebizitza suntsitu ditu eta 75 suhiltzaile zauritu dira
42.000 hektarea kiskali ditu jada, eta 220.000 pertsona ebakuatu behar izan dituzte. Agintariek, hala ere, baztertu egin dute Bordele husteko aukera, oraingoz. Macron presidenteak ministerio arteko bilera deitu du astelehen goizerako, krisia aztertzeko.