Iranek AEBren baseen aurkako erasoak eta Israelek bonbardaketak areagotu dituenean, Txinak su-etena eskatu du

Ekialde Hurbileko tentsioa areagotu egin da igande honetan, Iranek Kuwaiteko eta Bahraingo base estatubatuarrei eraso diela jakin ostean. Suteak piztu dira oinarrizko azpiegituretan, eta Persiar golkoko herrialdeek egoera salatu dute.

Tasnim Irango agentzia ofizialaren arabera, Kuwaiten, misilak erabiliz eraso diote Arifjan baseari, Israelen eta AEBren jomugen aurkako erasoaldi berri batean.

Kuwaiteko agintariek baieztatu dute misil eta drone olde bati erantzun diotela. Erasoek suteak eragin dituzte Kuwaiteko Nazioarteko Aireportuan eta Gizarte Segurantzako Erakunde Publikoaren egoitzan. Barne Ministerioak jakinarazi du Kuwaiteko bi militar hil direla segurtasun lanetan ari zirenean.

Bahrainek ere salatu ditu Iranen erasoak. Mina Salman portuan dagoen base militar baten inguruan erasoak egin ditu Iranek.

Golkoko Lankidetza Kontseiluko herrialdeek erasoak gaitzetsi dituzte eta arriskutsutzat jo dute indarkeriaren gorakada. Jasem Mohamed Albudaiwi erakundearen idazkari nagusiak Kuwaiten eta Bahrainen "azpiegituren aurka Iranek egindako eraso negargarriak" salatu ditu, eta eskualdeko segurtasuna ezegonkortzen saiatzea leporatu dio Teherani.

Ordu batzuk lehenago, Masud Pezeshkian Irango presidenteak esan du bere herrialdeak ez dituela erasoak egingo inguruko herrialdeen aurka, lurralde horietatik Irani erasotzen ez badiote.

Bitartean, Israelek indartu egin du bere operazio militarra. Israelgo Armadak esan du Teheranen Irango indar armatuek erabilitako erregai-biltegien aurkako erasoak egin dituela. Halaber, gaineratu du Irango F-14 borroka-hegazkinei eraso diela Isfahan hiriko aireportuan.

Irango Segurtasun Nazionaleko Kontseilu Goreneko idazkari Ali Lariyanik jakinarazi du soldadu israeldarrak atxilotu dituztela, atxiloketak non izan diren argitu gabe, eta AEBri bere bajak ezkutatzea leporatu dio.

Israelek Libano bonbardatzen jarraitu du. Gutxienez 25 pertsona hil ditu larunbatetik iganderako gauean, herrialdearen hegoaldeko herrietan eta Beirut hiriburuan egin dituen erasoetan, Libanoko Albiste Agentzia Nazionalaren arabera.

Israelgo Armadaren arabera, Beiruten "eraso zehatza" egin du Irango Guardia Iraultzailearen Quds Indarreko komandanteen aurka. Hezbollah talde xiitak, berriz, ziurtatu du Israelgo tropekin zuzeneko borrokaldiak izaten ari dela Aitaroun udalerritik gertu.

Liskarren gorakadaren aurrean, Wang Yi Txinako Atzerri ministroak operazio militarrak berehala bertan behera uzteko eskatu du, gatazka areagotu ez dadin. Prentsaurreko batean Txinako diplomaziaburuak esan duenez, "gerra ez zen inoiz lehertu behar"; izan ere, horren hitzetan, "ez dio inori mesederik egiten".