Irango gerrak egunean 10 milioi petrolio upel galtzea eragin du eta presioak upelaren prezioa 100 dolar ingurutan jarri du

Persiar Golkoan eta Ormuzko itsasartean itsasontziei egindako eraso berriek (tartean Irakeko uretan zeuden bi petrolio-ontzi), Irango gerraren hamahirugarren egunaren hasiera baldintzatu dute, brentaren prezioa upeleko 100 dolarretik gora igoaraziz goizaldean, nahiz eta gero jaitsi egin den berriro.

Otsailaren 28an AEBk eta Israelek Iranen aurka abiatutako gerra hau 2025eko ekaineko Hamabi Eguneko gerra baino gehiago luzatu da dagoeneko, eta hondamendia eragiten ari da Ekialde Hurbil osoan. Energiaren Nazioarteko Agentziak (IEA) hartutako larrialdi-neurriak gorabehera, krisi energetiko baterako mehatxuak ozenagoak dira egunak igaro ahala.  

Agentziaren azken txostenaren arabera, Ormuzko itsasartean itsas-trafikoa etetearen ondorioz, merkatuan 10 milioi upelen baliokidea galdu dira egunero (8 petrolio gordinarenak eta 2 petroliotik eratorritako produktuenak).

Ormuzko itsasartetik igarotzen den garraio fluxua lehengoaren % 10etik behera da. Izan ere, orduan eguneran 15 milioi upel petrolio gordin igarotzen ziren handik eta beste 5 milioi upel petroliotik eratorritakoenak, munduko eskaintzaren % 20 inguru, orotara. 

Bien bitartean, Golkoko beste ekoizle batzuk —Arabia Saudi edo Irak, esaterako— ekoizpena murriztu dute eta bide alternatiboen bila ari dira Ormuzeko itsasartzea saihesteko. 

IEAk gogorarazi duenez, itsasarte horretatik ateratzen ziren fluxuen % 90 Asiako merkatura bideratzen ziren, Europara % 4 eta AEBra % 3.

Txostenaren egileek azpimarratu dutenez, gatazkak petrolioaren eta gasaren merkatuetan eta, oro har, ekonomian izango duen eragina, eraso militarren intentsitatearen eta energia aktiboei eragindako kalteen mende ez ezik, Ormuzko itsasartetik itsas trafikoa etetearen iraupenaren mende ere egongo da".

Irango petrolioa Ormuzen dabil

Petrolio-ontzien jarraipena egiten duen Kpler konpainiaren eta itsas-merkataritzaren inguruko datuak biltzen dituen Lloyd 's List Intelligence konpainiak egindako azterketa baten arabera, gerra hasi aurretik baino petrolio gehiago ari da esportatzen orain Iran Ormuzko itsasartetik. 

Txostenaren arabera, Golkoko beste herrialde batzuetakoa ez bezala, Irango petrolio gordina Ormuzetik barrena ateratzen ari da; sei petrolio ontzi atera dira Irandik otsailaren 28tik, AEBk zigortutako Cuma ontzia barne, aste honetan itsasoratu zena. AEBk zigortutako petrolio-gas likidotuaren beste bi ontzi ere itsasoratu ziren Irandik, ostiralean, karga bertan hartu ostean, Reutersen arabera.

Agentzia horrek jasotako beste azterketa baten arabera, gutxienez 11 milioi petrolio upel atera dira Irandik; zehaztu dutenez, bertatik 8 milioi upelekin atera ziren lau superpetroliontzi Singapur inguruko uretara iritsi ziren, Asiako merkaturako bidean.