EBk ospatu egin du Hungariak "Europarako bidea" hartu izana, eta Errusiak harreman "pragmatikoa" espero du

Ursula von der Leyen Europako Batzordearen presidenteak poza agertu du igande honetan Hungariak "Europarako bidea" hartu du izana, Peter Magyar kontserbadorearen Tisza oposizioko alderdiari garaipena eman dioten Legebiltzarrerako hauteskundeen ostean.

"Hungariak Europa aukeratu du. Europak beti aukeratu izan du Hungaria. Herrialdeak Europarako bideari ekin dio berriro. Indartu egin da Batasuna", esan du Europar Batasunaren buruak sare sozialetan, mezu baten bidez.

Von der Leyenek, gainera, Magyarrekin hitz egin zuen, emaitzen ostean presidente berria zoriontzeko, eta biek " lankidetza estua" izatea adostu zutela jakinarazi du Paula Pinho Europako Batzordearen bozeramaileak.

Bestalde, Europako Kontseiluaren presidente Antonio Costak adierazi duenez, "parte-hartzearen datuek uzten dute hungariar herriaren espiritu demokratikoa".

Halaber, Hungariako buruzagi berriarekin "lankidetza estuan" jardun nahi duela esan zuen, "Europa leku indartsuagoa eta oparoagoa izan dadin".

Roberta Metsola Europako Parlamentuaren presidenteak ere zoriondu zuen Magyar, Europako Alderdi Popularreko eurodiputatua, eta gaineratu zuen "Hungariaren lekua Europaren bihotzean" dagoela.

Errusiak harreman "pragmatikoa" nahi du

Kremlinek, aldaketa politikoaren aurrean, esan du harreman "pragmatikoa" izaten jarraitu nahi duela Hungariarekin, hauteskundeetan bere gertuko aliatua izan denak porrota jaso ostean.

Dmitry Peskov Errusiako Gobernuaren bozeramaileak esan du hungariarren erabakia errespetatzen duela, eta bi herrialdeen arteko harreman onari eusti nahi diola.

Peskovek baztertu egin du Magyarrek lortutako garaipenak Ukrainako gerran eraginik izatea, Hungariako gobernu berriak Ukrainari laguntzak ematea eta Errusiari jarritako zigorrak ugaritzearen inguruan galdetuta.

"Nik ez dut uste horrek zerikusirik duenik Errusiaren eta Ukrainaren arteko gatazkaren norabidearekin. Ziur aski, prozesu desberdinak dira, horregatik ez dut uste nolabait lotuta daudenik", esan du.

Horren harira, salatu du Brusela "Kieveko erregimenaren asmo militaristak" bultzatzen ari dela, eta horrek ez duela laguntzen konponbide baketsua bilatzen.

"Europarrek ez dute ezkutatzen gerrarekin jarraitzeko duten borondate orokorra, bide guztietatik gerraren jarraipena bermatzea. Gu, aldiz, gure helburuak lortzen saiatzen ari gara. Guretzat hobe litzateke negoziazio politiko-diplomatikoen bidez lortzea. Negoziazioek emaitzarik ez duten bitartean, operazio militar bereziak aurrera jarraituko du", adierazi du.

Europako liderren zorion mezuak

Europako buruzagi nagusiak pozik agertu dira Magyarren garaipena dela eta.

Hala, Emmanuel Macron Frantziako presidenteak, esate baterako, Magyar zoriondu du, eta harekin hitz egin zuen, babesa emateko: "Peter Magyarrekin hitz egin berri dut, Hungarian lortutako garaipenagatik zoriontzeko!", adierazi zuen Macronek.

Friedrich Merz Alemaniako kantzilerrak ere zoriondu du Magyar garaipenagatik: "Hungariak erabaki egin du. Zorionak hauteskundeak irabazteagatik, Peter Magyar maitea. Ilusioz espero dut Europa indartsu, seguru eta, batez ere, batu baten aldeko lankidetza", idatzi zuen Mertzek X sare sozialean, Hungariako lehen ministroak, Viktor Orban ultranazionalistak, porrotaren berri eman eta gutxira.

Petteri Orpo Finlandiako lehen ministroak Hungariako hauteskundeen emaitzak pozik hartu zituen, eta esan zuen agerian uzten zutela EBn eta NATOn aktore aktiboa izan behar duela herrialdeak. Era berean, Hungariako emaitzek ematen duten aukera nabarmendu zuen: "Gure balio eta segurtasun komunitatean jokabide eraikitzailea duen eragilea izateko aukera. Peter Magyar zoriontzen dut. Espero dut ahal duen guztia egitea, konfiantza berreskuratzeko".

Pedro Sanchez Espainiako Gobernuko presidenteak garaipena ospatu zuen eta "Europak eta Europako balioek" irabazi dutela adierazi zuen. Gainera, txapela kendu zuen hungariar herriaren aurrean "hauteskunde historikoak" posible egiteagatik, eta Magyar harekin lan egitera gonbidatu zuen, "europar guztiek etorkizun hobea izan dezaten".

Keir Starmer Erresuma Batuko lehen ministroak Magyar zoriondu du, herrialdeari eta Europako demokrazian "abagune historikoa" etorrarazteagatik. "Zorionak, Peter Magyar, zure hauteskunde garaipenagatik. Une historikoa da hau, ez bakarrik Hungariarentzat, baita Europako demokraziarentzat ere", idatzi zuen Britainia Handiko buruzagiak X sare sozialeko bere profilean.

Ildo beretik mintzatu da Giorgia Meloni Italiako lehen ministroa, eta Magyarren hauteskunde garaipen "argia" nabarmendu zuen: "Zorionak Peter Magyarri hauteskundeetan lortutako garaipen argiagatik, Italiako Gobernuak lan ona egitea opa dio", idatzi du ultraeskuineko agintariak, Viktor Orban bere "lagun" eta orain arteko homologoari eskerak eman aurretik.

Azkenik, Poloniako lehen ministroak, Donald Tuskek, zorion mezua bidali dio Magyarri Legebiltzarreko hauteskundeetan lortutakoagatik: "Hungaria, Polonia, Europa, berriro elkarrekin!", idatzi du agintari poloniarrak Xn.

Volodimir Zelenski Ukrainako presidenteak ere Magyarren "garaipen sendoa" azpimarratu du, eta bi herrialdeen arteko harreman nahasiak konpontzeko prest dagoela jakinarazi dio: "Ukrainak beti nahi izan du harreman onak izan Europako bizilagun guztiekin, eta prest gaude Hungariarekin dugun lankidetza areagotzeko".

Imanol Pradales lehendakariak ere Magyar zoriondu du. 

Eslovakiako eta Txekiako Errepublikako gobernuek argi aitortu dute Orbanen porrotarekin aliatu bat galdu dutela, nahiz eta auzo herrialdeko Gobernu berriarekin harreman onak edukitzeko esperantza agertu.

"Viktor Orban aurkari gogorra da, eta hari aurre egitea sekula ez da erraza izan, baina hungariarren konfiantza eskuratu du, eta esperantza handia jarri dute beregan (Magyarrengan). Ezin du huts egin", idatzi du sare sozialetan Andrej Babis Txekiako Errepublikako lehen ministro populista eskuindarrak.

Robert Fico lehen ministro eslovakiar eta populista ezkertiarrak, bere aldetik, Orbanen itzala goraipatu du, eta hauteskunde emaitzak aintzat izango dituela adierazi du.

"Nire ibilbide politiko luzean, sekula ez dut ezagutu subiranotasunaren eta interes nazionalen defendatzaile handiagorik", adierazi du Orbanen gainean.