Huthiek itsas blokeoa ezarri diote Saudi Arabiari, Riadeko "setioari" erantzuteko

Yemengo huthiek Saudi Arabiaren aurkako itsas blokeoa ezarri dutela iragarri dute astelehen honetan, Riadeko "setio" etengabeari erantzuteko. Bi aldeen arteko tentsioa areagotu egin da egunotan; saudiarabiarrek Yemengo Sana hiriburuko aireportuaren aurkako erasoak egin dituzte, eta, horiei erantzunez, huthiek Saudi Arabiako Abha aireportuko instalazioak bonbardatu dituzte.

Yahya Sari huthien bozeramaile militarrak bere sare sozialetan zabaldutako ohar batean adierazi du itsas-enbargoa "begia begi truk" printzipioaren arabera aplikatuko dutela, eta blokeoa "berehala" sartuko dela indarrean.

Sarik Yemengo herriak "blokeoari beste blokeo batekin erantzuteko eta eskalada osoari antzeko eskalada batekin erantzuteko" eskubidea duela defendatu du. Era berean, eskualdean "edozein eskalada" egiteko aukera ematen duen "zentzugabeko edozein ekintzaren aurrean" bere indarrek irmo erantzungo dutela adierazi du.

"Saudi Arabiako etsai kriminalak duela ia hamabi urtetik setio bidegabea eta zapaltzailea ezarria du gure herri maitearen aurka, gure baliabideak arpilatzen ditu eta gure portu eta aireportuei blokeoa ezarria die lehorrean, itsasoan eta airean", kritikatu du. Gainera, herritarrei sufrimendu "onartezina" eragin diela azpimarratu du, "maila jasangaitzetaraino", eta horrek ez duela "inolako justifikaziorik".