Udaberri girotik negu girora
Eguraldiak zuritik beltzera egingo du datozen egunetan, eta hego-haizeak giro epela eragin ostean, ipar-haizeak hotza ekarriko du, eta prezipitazioekin batera, elurra ere espero da 1.000 metrotik behera.
Gaur, hodeiak eta ostarteak izango ditugu zeruan. Hainbat momentutan, zerua hodeitsu agertuko da, baina argiuneak ere izango dira tarteka. Oro har, egunak ateri eutsiko dio, baina momentu batzuetan euri pixka bat egitea ere ez da baztertzen. Hegoaldeko haizea ibiliko da, atzo baino ahulago, eta kostaldean iparraldekoa sar daiteke arratsaldean, indar handirik gabe. Tenperatura maximoak antzekoak edo aurreko egunekoak baino apur bat baxuagoak izango dira.
Astelehenean, egoera aldatu egingo da. Goizaldean eta goizean goiz, hego-haizea ibiliko da, baina indarra galduko du, eta iparraldekoa sartuko da eguerdi inguruan. Zeruan hodeiak ugaritzen joango dira, estalita geratu arte. Goizean, zaparradak egin ditzake kostaldean, eta ondoren, eguerditik aurrera bereziki, euria barnealdera ere hedatuko da. Haize aldaketarekin, nabarmen freskatuko du, eta beroenak 15 ºC ingurukoak edo baxuagoak izango dira.
Asteartean, giro hotzagoa baina lehorragoa izango dugu. Goizaldean eta goizean goiz, euri pixka bat egin dezake ipar partean, baina ateri egongo da gainerakoan, hodeiekin eta ostarte batzuekin. Ipar-ekialdeko haizea ibiliko da, eta hotz egingo du; tenperatura beroenak 10 ºC-tik behera geratuko dira barnealdean, eta 10-12 ºC-koak izango dira kostaldean.
Ostegunetik aurrera, are gehiago jaitsiko da tenperatura, eta prezipitazioak espero dira, baita elurra ere goialdeetan.
Zure interesekoa izan daiteke
Haize zakarraren ostean, zirimiriak hartuko du lekukoa asteburuan
Abisu horia bertan behera geratuko da eta giro epel-hezeak hartuko du lekukoa, larunbatean eta igandean zirimiri eta hodei gehiago espero baitira.
Baretu da azken orduetan gorabehera ugari eragin dituen haize zakarra
Oizen, 150 km/h-ko haize-boladak izan dira goizeko lehen orduan; Zarautzen, 136,5 km/h-koak neurtu dituzte, eta Untzuetan, berriz, 132 km/h-koak. Haizeak, gainera, gorabeherak sortu ditu errepideetan.
Zergatik eta noiz arte bero hau?
Garai honetan ohikoa izaten da bero-bolada, San Martinetako uda txikia deitzen zaiona gertatu ohi baita, azaroaren erdi aldera. Bolada epel hori Föhn efektuaren ondorioz gertatu ohi da, baina, aurten, bero hori areagotu duen Claudia borraskarekin elkartu da.
111 km/h-ko haize ufadak neurtu dituzte Urduñan, Claudia borraskak eraginda
Haizeari dagokion abisu horia indarrean dago EAEn eta Nafarroaren zati batean, eta gainera abisu horia aktibatu dute Bizkaian eta Gipuzkoan baso sute arriskuagatik, hegoaldeko haizea dela eta.
Abisu horia ezarri dute asteazkenerako EAEn eta Nafarroaren zati batean, 100 km/h-tik gorako haize-boladak egingo dituelako
Gainera, Eusko Jaurlaritzak abisu horia aktibatuko du Bizkaian eta Gipuzkoan baso sute arriskuagatik, hegoaldeko haizea dela eta.
Aste eguzkitsua eta epela, hego-haizea protagonista
Zerua oskarbi egongo da, hein handi batean, eta tenperatura maximoak 20 ºC-tik gora kokatuko dira leku askotan, minimoak freskoak izango badira ere.
Lehen elurtea Nafarroako Pirinioetan: Belagua mantu zuri fin batekin esnatu da
Nafarroako Pirinioetan, Belaguako mendatea 5 zentimetro inguruko elur geruza batekin eta 1 ºC-ko tenperaturarekin esnatu da larunbat honetan. Segurtasuna bermatzeko, kateak edo neguko pneumatikoak behar dira NA-137 (Izaba-Frantzia) errepideko 56. eta 59. kilometroen artean zirkulatzeko.
Asteburu euritsu eta haizetsua, eta hobekuntza nabarmena igandean EAEn
Euria eta haizea izango dira nagusi gaur eta larunbatean, bereziki isurialde atlantikoan. Igandean, aldiz, giro lasai eta eguzkitsuagoa espero da, eta tenperaturak apur bat gora egingo du.
Haizeak gogor jotzen jarraituko du gaur, eta itsasaldeko arriskuagatik ezarritako abisu horia ere bai
Haize zakarra eta olatu handiak izango ditugu gaur ere. Marea biziek atzo Bilboko itsasadarrak gainezka egitea eragin zuten, eta Loiuko aireportuan lurreratzekoak ziren hainbat hegazkin beste aireportuetara bideratu behar izan ostean. Segurtasun Sailak itsaso zakarragatiko abisuari eutsiko dio gaur arratsaldeko itsasgoran.