Giro oso estalia eta freskoa asteko lehen egunetan

Makur dator aste hasiera, eguraldiari dagokionez. Astelehenean iritsiko da aldaketa. Zerua hodeitsu esnatuko da eta zirimiria egingo du. Tenperaturak nabarmen jaitsiko dira, batez ere barnealdean. Igandean baino 10 gradu gutxiago neurtuko dira toki askotan. Ia Euskal Herri osoan, Nafarroako hegoaldean salbu, 20 gradutik behera egongo dira, ipar-mendebaldeko haizeak nabarmen freskatuko baitu giroa.

Asteartean ere, ildo beretik jarraituko du eguraldiak. Fronte hotz bat sartuko da, eta bezperan baino euri gehiago egingo du, bereziki goizean. Tenperaturak freskoak izango dira oraindik: 20 gradutik beherakoak. Gasteizen, adibidez, termometroak nekez iritsiko dira 16 gradura. Zenbat eta hegoalderago, nabarmenagoa izango da tenperaturen jaitsiera.

Asteazkenerako ez da aldaketa handirik espero. Iparraldeko haizeak egun freskoa ekarriko du berriro ere gurera, nahiz eta seguruenik 1-2 gradu epelduko  duen. Goizean, euri arina egingo du berriro, eta orduek aurrera egin ahala, argitzera egingo du.

Ostegunerako ez du ematen euri konturik izango dugunik. Hala ere, zerua estalita egongo da goizean. Arratsaldean, berriz, ostarteak irekiko dira, eta kostata bada ere, zertxobait berotuko du: 19 graduko langara iritsiko dira tenperaturak kostaldean eta 25 gradura barnealdean.

Ostiralean, eguzkia ikusteko aukera izango dugu. Hodei gutxi iragarri dituzte ordurako. Haizeak ipar-ekialdetik joko du, eta kostaldean 21 gradu izango dira; barnealdean, berriz, 25 eta 28 gradu artean. 

Asteburuak uda usaina ekarriko du. 25-30 graduraino helduko dira termometroak denean, eta mendi inguruetan lainoren bat edo beste sartuko bada ere, oro har larunbata egun eguzkitsua izango da, baita igandea ere. Uda beteko eguraldia iragarri dute asteko azken egunerako, eguzkitsua eta tenperatura altuekin.