Tenperaturak goranzko bidean Euskal Herrian asteburuari agur esateko
Goizeko lehen orduetan, behe-hodeiak eta behe-lainoa agertuko dira ohiko lekuetan. Orduak igaro ahala, ordea, desagertu egingo dira, eta eguraldi atsegina izango dugu, orokorrean. Tenperatura maximoak igotzen joango dira egunez egun: igandean, 25 ºC ingurura iritsiko dira kostaldean eta 30 ºC-tik gora ibiliko dira barnealdean.
Aizkorri. Argazkia: Cesar Urien
Asteburu honetan, eguraldi egonkorra eta eguzkitsua izango dugu, orokorrean, eta tenperaturek goranzko bidea hartuko dute. Igandea eta astelehena izango dira egun beroenak: 30 gradutik gorako tenperaturak gaindituko dira barnealdean eta 25 graduren bueltan geldituko dira kostaldean.
Igandean, eguzkia izango da nagusi, eta udako giroa izango da. Maximoak hiruzpalau gradu altuagoak izango dira: 30 ºC ingurukoak, barnealdean; 25-26 ºC-koak, berriz, kostaldean. Zerua oskarbi edo hodei gutxirekin egongo da, gauean goi-hodei batzuekin, eta lainoguneak agertuko dira egunaren hasieran. Haizea aldakor ibiliko da, eta ipar-ekialdekoa izango da arratsaldean.
Euskalmeten iragarpenaren arabera, astea joera berarekin hasiko da. Beroa egingo du astelehenean. Tenperatura maximoek gora egingo dute berriro, eta 30 ºC-tik gorakoak izango dira; zenbait lekutan, 35 ºC ingurukoak. Tenperatura minimoak ere igoko dira. Eguzkia jaun eta jabe izango da berriro. Haizea ahul eta aldakor ibiliko da; goizean hegoaldekoa nagusituko da, eta arratsaldean, ipar-ekialdekoa.