Galegoa, euskara eta gaztelaniaren ondoren Bizkaian hiztun gehien dituen hizkuntza

Bizkaian, 120 hizkuntza baino gehiagotan hitz egiten da, eta, euskaraz eta gaztelaniaz gain, galegoz, arabieraz, amazigeraz (berberera) eta errumanieraz hitz egiten da gehien, Lorea Agirre Bizkaiko Aldundiko Euskara, Kultura eta Kirol diputatuak gaur, ostiralarekin, aurkeztutako txosten batean jaso dutenez.  

2019. urtean, atzerritar jatorri zuzeneko 115.686 biztanle zeuden Bizkaian, bizkaitarren % 10. Horien erdiak, 50.230, hizkuntza ofizialen artean gaztelania duten hamar estatutakoak dira: Kolonbia, Bolivia, Paraguai, Nikaragua, Venezuela, Ekuador, Peru, Argentina, Honduras eta Kuba.

Gaztelania aparte utzita, hizkuntza erromantzeei begiratuta, 25.697 biztanlek dute galiziera jatorri hizkuntza gisa eta 7.018k katalana; jatorria Portugalen edo Brasilen duten bizkaitarrak, berriz, 5.793 dira eta portugesa dute jatorri hizkuntza; errumaniera 11.119 pertsonak erabiltzen dute eta frantsesa 2.529k.

Marokotik eta Aljeriatik etorritako biztanleak kontuan hartuz, arabierak ere presentzia esanguratsua du Bizkaian: 13.435 bizkaitarrek dute arabiera edo amazigera jatorri hizkuntza gisa.

Gainera, bizkaitar askok hitz egiten dituzte Senegalen jatorria duten wolof, fula edota serer hizkuntzak (3.259, guztira); Nigeriatik etorritakoak (jorubera, igboera eta hausa) 1.877 hiztunek; eta 1.477 herritarrek Pakistandik etorritakoen hizkuntzak (urdu eta punjabera).

120 hizkuntza

Orotara 120 hizkuntza inguru hitz egiten dira Bizkaian, jatorri-hizkuntzen aniztasuna kontuan izanik:

Europako hizkuntza ofizialak (galegoa, katalana, portugesa, alemana, errusiera, italiera, georgiera, moldaviera, poloniera, bulgariera, bielorrusiera, suediera, albaniera, greziera, lituaniera, txekiera, hungariera, armeniera, serbiera, daniera, norvegiera, finlandiera, kroaziera, letoniera, esloveniera, azerbaijanera…).

Ez ofizialak (erromantxea, flandesera, frisiera, galesera edota Eskoziako edo Irlandako gaelikoa, besteak beste);

Amerikan jatorria duten guarania, kitxua, ketxua, aimara, ingelesa, nahuatl, mapudungun.

Afrikatik etorri diren kikongo, lingala, swahili, fula, soninkera, wolofera, amarhera, sothoera, swaziera, jorubera, igboera, fula, bubiera, sekiera, soninkera, moorea, diolera, akanera, fang, bubiera, kombo, lingala, mandinkera, pulaarera, besteak beste.

Asiatik nepalera, bengalera, indi, asamera, bodoera, vietnamera, japoniera, indonesiera, kazakhera, persiera, paxtunera, mongoliera, malaysiera, besteak beste.

Ozeaniatik Maoriera, fijiera, tagalo, samoera…

Txostena Xabier Aierdi soziologoak eta Belen Uranga soziolinguistak egin dute.