EGOk Kanarietako Orkestra Gaztea gonbidatu du 25. urteurrena ospatzeko

Kanarietako taldeak Gasteizen hasiko du bira uztailaren 21ean, eta Arabako hiriburura ez ezik, Azkoitiara, Bilbora, Donostiara, Hondarribira eta Donostiako Musika Hamabostaldira ere iritsiko da.

N. V. | EITB Media

2022/07/18 - 14:21

Azken eguneratzea

2022/07/18 - 14:21

EGO Euskal Herriko Gazte Orkestra uda honetako bere jardueraren azken zertzeladak lotzen ari da, 25. urteurrena ospatzeko baliatuko dituzten ekimenak biribiltzen. Besteak beste, JOCAN Kanarietako Gazte Orkestra gonbidatu dute, eta elkarlanean arituko dira bi taldeok.

Aurreneko aldia izango da EGOk bere programazioan beste gazte orkestra bat jasoko duena.

Kanarietako Gazte Orkestrak bost kontzertuko bira egingo du (Gasteiz, Azkoitia, Bilbo, Donostia eta Hondarribia, uztailaren 21etik 27ra), Victor Pablo Perez orkestra horren zuzendari artistikoak gidatuta.

Kanariar taldearen programazioa osatuko dute F. Mandelssohnen "1 zenbakiko Sinfonia"k eta Txaikovskiren "Biolinerako kontzertua"k, azken horretan bakarlaria Nemanja Radulovic dela.

Kontzertu sorta horren ondoren, EGOko eta JOCANeko musikariak lankidetzan arituko dira Musikeneren egoitzan, bi taldeok uztailaren 5ean Donostiako Musika Hamabostaldiaren barruan emango duten kontzertua prestatzeko. Donostiako Orfeoiarekin eta Carmen ARtaza donostiar mezzosopranoarekin batera, Gustav Mahlerren "3 zenbakiko Sinfonia" joko dute, Victor Pablo Perezek zuzenduta.

Programa hori bukatutakoan, EGO "Eta orain zer?" proiektuan murgilduko da, Kukai Dantza taldeak bultzatuko duen egitasmoan. Ruben Gimeno EGOren zuzendari artistikoaren zuzendaritza artistikoa duen lanean, "musika, dantza eta mugimendua" uztartuko dituzte.