PPko zinegotzien ustezko erasotzaileak: 'Protesta baketsua izan zen'

19 akusatuetatik hamabostek esan dute 2003an Laudioko Udal Gobernua osatzeko bilkuran agertu zirenean "protesta baketsua" egin nahi izan zutela. Epaiketa gaur hasi da Auzitegi Nazionalean eta derrigortze terrorista egotzi die Fiskaltzak.

Angela Murillo Auzitegi Nazionaleko epailearen aurrean deklaratu dute 19 akusatuetatik hamabostek. Fiskaltzak hiru urteko kartzela-zigorra eskatu du beraientzat, eta akusazio partikularrak, aldiz, urtebete eta sei urte arteko espetxealdia.

Fiskaltzaren arabera, 2003ko ekainaren 14an akusatuak Laudioko Udal Gobernua osatzeko bilkuran sartu ziren, alkate berriak eta zinegotziek kargua hartu ez zezaten. Auzitegi Gorenak alde batera utzi zuen Laudio Aurrera plataformaren hautagaitza, 2003ko maiatzaren 3an, Batasunarekin lotuta zegoelakoan, eta akusatuek udaletxean horren aurka protesta egiteko asmoa zuten, ustez, egun horretan.

Halaber, Fiskaltzaren arabera, pertsona erasotuek (aginte mailakoak, denak) bizkartzainek babestuta utzi behar izan zuten aretoa, eta, horiei esker, "eraso larriagoak saihestu" ziren.