Erregeak 'krisiaren aurka zatiketarik gabe borrokatzeko' deia egin du

Juan Carlos I.a Espainiako erregeak krisiari aurre egiteko "batera" borrokatzeko deia egin du, "egungo egoera politiko, sozial eta ekonomikotik" ateratzeko. Horren harian, "egin daitekeen okerrena indarrak zatitzea, desadostasunak bultzatzea, ameskerien atzetik joatea eta zauriak sakontzea" dela esan du.

Mezua Diada eguneko Bartzelonako manifestazio jendetsuaren ostean etorri da, izan ere, bertan Kataluniaren independentzia aldarrikatu zen, eta Artur Mas Generalitateko presidenteak mezua bere egin zuen.

Erregearen mezua errege-etxearen webgunean argitaratu du gaur eta bere ekimen propioa izan dela argitu dute Zarzuelako iturriek, nahiz eta Mariano Rajoy Gobernuko presidentearekin hitzartu duela azaldu duten.