Espainiako Gobernuari biktimen memoriala bultzatzea eskatu dio Aresek

Rodolfo Ares PSE-EEko Antzolakuntza idazkariak Espainiako Gobernuari eskatu dio Terrorismoaren Biktimen Memoriarako Zentroa bultzatzea. "Geldituta" omen dago momentu honetan eta proiektu honetarako Eusko Jaurlaritzaren lankidetza "ez gutxiesteko" eskatu dio Gobernu zentralari.

Aresek adierazi du ezin dela proiektu hau "denbora gehiagoz atzeratu" eta PP alderdiak "ezer ez egitea" memorialaren alde, "terrorismoaren biktimen alde azaldu denean eta sentsibilitate handia" erakutsi duenean beti.

"Dirudienez, gauza bat da esaten dena eta beste bat egiten dena", azaldu du buruzagi sozialistak prentsaurreko batean. Eusko Jaurlaritza eta Espainiako Gobernua ez dira ados jartzen memorialaren sortze prozesuaz eta geroko kudeaketaz.

Iñigo Urkulluren gobernuak diseinua bere gain hartu nahi du eta Euskadin izatea nahi du. Barne ministerioak, bitartean, Espainia mailako izatea nahi du eta Gobernu zentralak zuzendua.

"Ezin da onartu Gobernu zentralak eta PP alderdiak biktimen alde daudela esatea eta urtebete baino gehiago izatea lege hori bete gabe", esan du.

Egitasmoa atzeratzearen zergatien inguruan, Aresek uste du ez dagoela arrazoi ekonomikorik: "nahi bada, badago dirurik. Lehentasun arazo bat da eta sozialistentzat, memoriala lehentasun bat da".

Proiektuaren "beharra eta larritasuna" azpimarratu du, ETAk armak utzi dituen momentuan eta erakundea babesten dutenek "historia berriz idatzi nahi" dutenean, bere ustez, "memoriari eza ezarriko da eta erantzukizunak disolbatu egingo dira" bestela.