Sarek 'giza eskubideak defendatzea' eskatuko du irailaren 20an

Sare ETAko presoen eskubideak defendatzen dituen plataformak irailaren 20an Bilbon, Miribillako Bilbao Arenan, egungo espetxe-politikarekin bukatzea eskatzeko egitekoa den ekitaldia aurkeztu du. Horren ildotik esan dutenez, ekitaldiak "giza eskubideak defendatzea eta sakabanaketarekin bukatzea" eskatuko du, besterik ez.

Aurkezpenean Jule Goikoetxea eta Agus Gorbea plataformako ordezkariek Carlos Urquijok Bilboko Udalari igorritako eskutitza izan dute hizpide. Urquijok Bilbao Arena ekitaldia egiteko baimena ez ematea eskatu du, bere ustean, biktimak "umildu" eta terrorismoa "goratu" lezaketelako.

"Gure asmoa giza eskubideak defendatu eta sakabanaketarekin bukatzea da. Horiek dira gure helburuak ez beste ezer biktimekin edo apologiarekin lotuta", argitu dute.

Halaber, plataformatik esan dutenez, Bilboko Udalak ekitaldia (Irailaren 20ko 18:00etan) egiteko baimena emanda du, eta ez zuen inolako "trabarik" jarri.

Sarek "sakabanaketarekin bukatzeko" deia egin du, "euskal preso politikoei eta horren ingurukoei duela 25 urte aplikatzen dieten salbuespeneko neurria" da.

Horren ildotik, "aniztasuna aintzat hartuta", "adostasuna" euren "ardatza" izango da, eta "indar metaketa" euren "ipar orratza".

"Espainiako eta Frantziako Gobernu zentralek kontrako jarrera kontuan hartuta, uste dugu sakabanaketarekin bukatzeko erronka onar dezakegula, gizartearen aktibazioak emandako indarrei esker", gaineratu dute.