Kataluniako kontsulta aho batez bertan behera utzi du Konstituzionalak
Kataluniako kontsulta aho batez bertan behera utzi du Auzitegi Konstituzionalak arratsaldean. Espainiako Gobernuak aurkeztutako bi helegiteak onartu ditu Konstituzionalaren osoko bilkurak.
Erabakia premiazko osoko bilkuran hartu dute. Behin-behineko baliogabetzea automatikoa izan da; izan ere, Gobernuak helegiteak aurkezten dituenean horrela aurreikusita dago.
Bost hilabete igaro baino lehen behin-behineko baliogabetzea luzatzeko edo bertan behera uzteko erabakia hartu beharko du epaitegiak, Konstituzionalaren Lege Organikoaren arabera.
Nahiz eta behin-behineko baliogabetzea erabaki, Konstituzionalak ez du deialdiaren legezkotasuna ebatzi.
Ebazpena ez atzeratzeko erabakia hartu du osoko bilkurak; izan ere, "Espainiako zein Kataluniako gizartearentzat planteatutako gaiek duten garrantzia politiko eta konstituzionalaren jakitun da auzitegia", Konstituzionalak agiri batean azaldu duenez.
"Helegiteak onartzeko baldintzak" betetzen zirela egiaztatzera mugatu dela azpimarratu du Konstituzionalak, "arazoaren mamia aztertu gabe".
Honenbestez, helegiteak onartu eta gero, "dekretu eta arauaren aplikazioan aurreikusitako ebazpen eta ekitaldiak" bertan behera geratzen dira, Auzitegi Konstituzionalaren arabera.
Helegite bakoitzeko probidentzia bat plazaratu du Konstituzionalak: kontsulten legea eta azaroaren 9ko deialdi dekretua.
Kontsulten legearen kasuan, erabakiaren berri eman die Konstituzionalak Generalitateari eta Kataluniako Parlamentuari. Horrela, bi erakundeek 15 eguneko epea izango dute alegazioak aurkezteko.
Era berean, Kongresuari eta Senatuari helegiteak eta agiriak igorri dizkie Konstituzionalak.
Deialdiaren dekretuari dagokionez, 20 eguneko epea eman die Auzitegiak erakunde berdinei prozeduran aurkezteko.
Abiadura "supersonikoa"
Bestalde, Konstituzionalaren abiadura "supersonikoa" kritikatu du Artur Mas Kataluniako presidenteak. Zalantzan jarri du Perez de los Cobos Auzitegi Konstituzionaleko presidentearen papera, PPko militante izan delako "denbora luzean", eta Parlamentuak hura errefusatzea eskatu zuela gogorarazi du.
Rajoyren agerraldia
Marta Silva Estatuko abokatu nagusiak Auzitegi Konstituzionalean erregistratu ditu Gobernuak onartutako bi helegiteak.
Ministro Kontseiluak helegiteak onartzeko ezohiko bilera egin ondoren Rajoyk Moncloa Jauregian azaldu duenaren arabera, "ez dago ezer, inor, botererik edo erakunderik subiranotasun bakarra eta zatiezinaren printzipioa hautsi dezakeenik; gure elkarbizitza printzipio horretan oinarritzen da". Rajoyk esan duenez, "inork ez die espainiar guztiei herrialdearen izaera erabakitzeko eskubidea ukatuko".
"Beti esan dugu kontsulta ez dela egingo Konstituzioaren kontra eta espainiar guztien eskubideen kontra egiten du", azpimarratu du.
Gainera, Rajoyren esanetan, Artur Mas Generalitateko presidenteak deitutako kontsulta "demokraziaren kontrakoa" da.
Halaber, "legea errespetatuz eztabaidatzea" proposatu dio Masi, eta, zera gogorarazi dio: "Oraindik ere denbora dago norabidea zuzentzeko".
"Okerrena da hasieratik zekiela" zer gertatuko zen, esan du Rajoyk, eta bera Gobernuko presidentea den bitartean "legea bere osotasunean errespetatuko da", nabarmendu du.
Rajoyren arabera, Artur Masek defendatzen duen bozkatzeko eskubidea "demagogia" da, "itxura ona du", baina errealitatea bestelakoa da, "lege demokratikoa ez da askatasunaren kontrako muga bat, baizik eta guztion arteko berdintasunaren eta segurtasunaren bermea". "Lege barik ez dago demokraziarik", erantsi du.
Konstituzioaren balizko erreforma baten inguruan, Rajoyk adierazi du "gaur lehentasuna (Konstituzioa) defendatzea" dela, eta Konstituzioari esker Kataluniako Generalitateak "inoizko eskumen handienak" dituela azpimarratu du.
Manifestazioak
Astearte honetarako, 19:00tan, udaletxeen aurrean manifestazioak deitu ditu Kataluniako Asanblada Nazionalak (ANC), Konstituzionalaren erabakiaren aurka protesta egiteko.
Alderdikideek protestetan parte hartuko dutela uste dute CiUko iturriek; izan ere, orain arte udaletako zinegotziek babesa eman diete kontsulten aldeko ebazpenei.
"Kontsulta egitea eskatzeko mobilizazio guztietan parte hartuko" dutela azaldu du ICVk.
Zure interesekoa izan daiteke
Eusko Jaurlaritzak eta Espainiako Gobernuak trafiko azterketen eta nekazaritza aseguruen transferentzia sinatuko dute astelehen honetan
Azterketen eta aztertzaileen antolaketa, zirkulazio-baimenak ematea eta ibilgailuen matrikulazioa eskualdatuko dira, baita bide-azterketa eta berreziketarako zentroen kudeaketa ere. Nekazaritzako aseguruei dagokienez, ENESAren funtzioak bere gain hartuko lituzte Jaurlaritzak.
Peinadori espedientea irekitzea aztertuko du Botere Judizialaren Kontseilu Nagusiak, Poliziari buruz esandakoagatik
Begoña Gomez auzipetzeko kaleratutako autoan epaileak esan du Poliziak ihes egiteko laguntza eman liezaiokeela Espainiako Gobernuko presidentearen emazteari.
Peinado epaileak Begoña Gomez epaitzea erabaki du, eta pasaportea kendu dio
Espainiako Gobernuko presidentearen emazteak ustez egindako delituak ikertzen ari da epailea, eta ahozko epaiketa abiatu aurretik hartu ditu kautelazko neurriak. Halaber, Espainiatik ateratzea debekatu dio, eta hamabostean behin epaitegian agertu beharko du. Defentsaren abokatuak helegitea jarriko du.
Londresera Euskadi "kritikatzera" eta etxebizitzaz hitz egitera joatea egotzi dio EAJk EH Bilduri, bere ekarpena "zero" izan arren
Iñigo Ansola EAJren BBBko presidenteak Pello Otxandiano Eusko Legebiltzarreko EH Bildu koalizioko burua kritikatu du aste honetan Londresera joateagatik, EH Bilduk etxebizitzari buruz egindako proposamena aurkeztera, "Euskadi zalantzan jarri eta kritikatzeko". Horren harian, Euskadin etxebizitza publikoa eraikitzeko egin duen ekarpena "zero" dela esan du.
Anduezak esan du PSE-EEk gogoz, esku garbiz eta indarrez jarraitzen duela udal eta foru hauteskundeetarako
Eneko Andueza PSE-EEko idazkari nagusiak adierazi du sozialistek herritarren kezkak konpontzeko lanean jarraitzen dutela. Datorren urteko udal eta foru hauteskundeei begira, gogoz, esku garbiz eta indarrez jarraitzen dutela esan du.
Hauteskunde orokorrak 2027an izango direla berretsi du Sanchezek, udal hauteskundeekin bat egin gabe
Pedro Sanchez Espainiako Gobernuko presidenteak berretsi du hauteskunde orokorrak 2027an izango direla. Maiatzeko hauteskunde autonomikoekin eta udal hauteskundeekin batera ez direla egingo erantsi du, baina ez du zehaztu aurretik edo geroago izango diren.
Euskararen lurgunea gero eta zabalagoa da Nafarroan, baina estuturik dauka Euskararen Legeak berak
Euskararen Foru Legeak 40 urte betetzen ditu aurten, eta euskara lekua irabazten joan den arren, legeak bere horretan jarraitzen du, lurraldea hiru eremutan banatzen, bai eta nafarren hizkuntza eskubideak mugatzen ere. Euskararen ofizialtasuna lurralde osora hedatzea askoren aspaldiko eskakizuna da, baina tramite administratiboaz harago, borondate politiko argia eta negoziazio gaitasuna eskatzen ditu prozesuak.
Hauek dira Zapaterok Plus Ultra auziko epailearen aurrean egindako deklarazioaren pasarte nabarmenenak
Espainiako Gobernuko presidente ohiak ukatu egin zuen Plus Ultra aire konpainiaren erreskatean inolako esku hartzerik izan zuela eta bere bulegoan egindako miaketan aurkitutako bitxien inguruan erantzutea saihestu zuen.
Iraolak EAJren eta EH Bilduren "inkoherentzia" salatu du Eibarko sokamuturraren auzian
Eibarko sanjuanetan sokamuturra berreskuratzea herritarren eskaria izan dela esan du Jon Iraola Eibarko alkateak (PSE-EE). Gaiak eragin duen polemika dela eta, EAJren eta EH Bilduren "inkoherentzia" salatu du, eurek gobernatzen duten udaletan beste jarrera bat omen dutelako. Hauteskunde interesen arabera jokatzea egotzi die biei.
Euskararen alorrean harago joateko eskatu dio Barkosek Chiviteri eta zonifikazioa kentzeko
Nafarroako presidente ohiaren ustez, euskara berezko hizkuntza gisa aitortzeak "ez luke ezer aldatuko", eta hizkuntza lurralde osoan ofizial egitea aldarrikatu du.