PSOEk Konstituzio Batzordea deitzeko eskatu du, eztabaida hasteko

Diputatuen Kongresuan Konstituzioari buruzko Batzordea deitzeko, eta, lehenbailehen, erreformari buruzko eztabaida hasteko eskatu die Pedro Sanchez PSOEko idazkari nagusiak Mariano Rajoy Espainiako Gobernu presidenteari eta gainerako alderdi politikoei.

Sanchezen iritziz, Konstituzioari buruzko Batzordearen lehen pausoa adituak eta erakundeetako zein autonomia erkidegoetako ordezkariak deitzea litzateke, Konstituzioaren erreformaren "eremua mugatzeko" eta "adostasun zabala lor dezaketen konponbideak proposatzeko".

Horren ondoren, Konstituzioari buruzko Batzordea abian jarriko litzateke erreformaren gaia sakonean aztertzeko.

Epeak zehaztu gabe, helburua batzordea "lehenbailehen" lanean hastea dela nabarmendu du.

Bestalde, autonomia erkidegoetako presidenteak bilera batera deitzea eskatu dio Pedro Sanchezek Mariano Rajoyri, harik eta erakundeen birsorkuntza demokratikorako neurriak bultzatzeko, finantzazio sistemak berrikusteko eta ekonomia suspertzeko neurriak aztertzeko.

Kataluniako prozesuaren aurrean, Rajoyk "berandu eta gaizki" erreakzionatu du

Perdro Sanchezen iritziz, Mariano Rajoy Espainiako Gobernu presidenteak Kataluniako prozesuaren aurrean, "berandu eta gaizki" erreakzionatu du, eta gainera ez dauka alternatibarik.

Azaldu duenez, Kataluniako prozesuaren aurrean, Espainiako Gobernuak blokeoa proposatu du eta horrek independentismoa indartzea edo indartzeko aukerak haztea baino ez du ekarri.

Horren esanetan, Rajoyk azken hilabeteetan jarraitu duen estrategia "okerra" izan da, izan ere, bere erantzukizuna saihestu eta epaitegien esku utzi du kontua.