Etxerat: "Aspertuta gaude gure senideekin beti salbuespenaz jokatzen dutelako"

"Aspertuta gaude gure senideekin beti salbuespenaz jokatzen dutelako eta ez zaielako legea aplikatzen", adierazi du Etxerat euskal preso eta iheslari politikoen senide eta lagunen elkarteak. Zentzu horretan, "euskal presoek onurak lortu dituztela diotenak gezurretan ari dira", salatu du elkarteak.

Bilbon emandako prentsaurrekoan, "gure senide presoek jasaten duten eskubideen urraketaren aurrean nazkatuta gaude", esan dute. "Ez gara onurez ari, euskal preso politikoek onurak lortu dituztela diotenak gezurretan ari dira", gaineratu dute.

"Gezurra esaten dute salbuespen-neurririk inoiz ez zaiela aplikatu eta orain ez zaiela aplikatzen ziurtatzen dutenek", errepikatu dute. Gogorarazi dutenez, "Espetxeetako Legeak eta Araudiak jasotzen dituen eskubideez ari gara, modu interesatuan eta mendekuz presoei ukatzen zaizkien eskubideez".

Auzitegi Nazionaleko Espetxe Zaintzako epaileak eta Auzitegi Nazionaleko 1. sekzioak 34 presoei dagozkien 71 irteera-baimen ukatu dituztela azaldu du elkarteak.

Hasieran, espetxeetako tratamendu-batzordeek -Araba (24); El Dueso (18); Martutene (12); Burgos (8); Basauri (6); Logroño (1), Zuera (1)- onartu zituzten baimen horiek. "168 preso baimenekin kalera ateratzen egon beharko lukete lege arrunta aplikatuz gero, baina 22 baino ez dira ateratzen ari", nabarmendu dute.

Etxeraten hitzetan ,erdi askatasunean ziren hiru pertsona berriro espetxera bueltatu behar izan dira. "132 presok 3. graduan egon beharko lukete lege arrunta aplikatuko balitzaie, zigorraren erdia bete ostean; 14 baino ez daude", kritikatu du.

Bestalde, "51 presok baldintzapeko askatasuna egon beharko lukete, zigorraren hiru laurdenak bete dituztelako", azpimarratu dutenez. "Aurten soilik 6k lortu dute", erantsi du elkarteak.

Elkarteko ordezkarien ahotan, "ia bost urte igaro dira gure senide presoek, gaur egun dauden 190 presoek, haien espetxe-ibilbide juridikoari ekin ziotenetik, konponbidearekin eta bizikidetzarekin konpromisoa hartuz, etengabeko oztopo-lasterketa bihurtu dena, lehenik gerturatzeko, gero irteera-baimenak izateko, ondoren hirugarren graduan sailkatzeko eta, azkenik, baldintzapeko askatasuna eskuratzeko".

"Gogaituta gaude legeak jasotzen ez dituen gauzak eskatzen zaizkielako, eta nazkatuta gaude espetxe-salbuespenari eusteko jartzen dituzten aitzakia politiko, mediatiko eta judizialekin", salatu dute.

Azkenik, "ezin dugu denbora gehiago itxaron, legeri arrunta aplikatzeko oztopoak eta trabak egunero saihestuz, ezin dugu sufrimenduaren luzapenaren biktima izaten jarraitu, eta ezin da euskal gizartea elkarbizitza eraikitzeko etengabeko atzerapenera kondenatu", aldarrikatu dute.