Udaletako emakume hautetsiek “emakume gehiago eta askotarikoak" erakartzeko konpromisoa hartu dute

Virginia Woolf Basqueskolak, tokiko emakumezko hautetsien sareak, hamargarren urteurrena ospatu du larunbat honetan, Bilbon egindako ekitaldi batean. Hurrengo agintaldirako konpromisoak adierazi dituzte, tartean, "emakume gehiago eta askotarikoak erakartzea parte-hartze politikora".

Unean, 1.215 tokiko emakumezko hautetsi daude Euskal Autonomia Erkidegoan (guztizkoaren % 46), eta 77 emakumezko alkate (% 30,7). Lurraldeka, Araban 182 emakume hautetsi daude (% 42,5) eta 13 alkate, Bizkaian 575 hautetsi (% 46,5) eta 35 alkate, eta Gipuzkoan, berriz, 458 hautetsi (% 46,7) eta 29 alkate.

Urteroko topaketak talde eragileko kideak eta bestelako parte-hartzaileak bildu ditu, Euskadiko emakumezko alkate eta zinegotzientzako espazio horretan. Basqueskola 2012an jaio zen "Suediako emakume hautetsien sarean inspiratuta, eta ekimen aitzindaria izan zen Euskadin, baita Estatuan ere", Eusko Jaurlaritzak eta Eudelek, proiektuaren sustatzaileek, azaldu dutenez.

Ekitaldiaren une nagusian, Basqueskolako lau ordezkarik hitza hartu dute 2023-2026 arteko udal legealdi berrian ondorengoei transferitu nahi dizkieten konpromisoak azaltzeko. Maite Etxebarria Abanto-Zierbenako alkatea, Carmen Diaz Getxoko zinegotzia, Maite Cordoba La Puebla de Labarcako alkatea eta Paula Amieva Getxoko zinegotzia ondorengo mezuen bozeramaile izan dira: "Basqueskolak laguntza ematea emakumeek udal-politikan duten sarbidea, iraupena eta eragina hobetzeko", "emakume gehiago eta askotarikoak politikako partaidetzara erakartzeko lan egitea", "tokiko politika eraldatuko duen lidergo feminista bat eraikitzeko lan egitea" eta "sare eta aliantzak modu estrategikoan ezartzeko lan egitea, Basqueskolaren konpromisoak bultzatze aldera".

Eusko Jaurlaritzatik eta Eudeletik nabarmendu dutenez, Europako Udalerrien eta Eskualdeen Kontseiluak ordezkaritza politikoari buruz egindako azken txostenaren arabera, "EAEko udalak emakumeen eta gizonen artean oreka handiena duten tokiko gobernuen buruan daude (hautetsien %46 emakumeak dira), Europako batez besteko %29aren eta Espainiako Estatuko %36aren oso gainetik". Halaber, Euskadiko tokiko gobernuetan, alkateen %30,7 emakumeak dira, Europako batezbestekoa gainditzen dutelarik.

Ekimenaren bi erakunde bultzatzaileek esker ona adierazi diote hiru lurraldeetako emakume hautetsien lan "indibidual eta kolektiboari", askotariko tamainetako udalerrietakoak eta askotariko sentsibilitate politikotakoak, "sarea ehuntzen" lagundu dutenak.

Gorka Urtaran Eudeleko buru eta Gasteizko alkateak bere hitzaldian nabarmendu duenez, Basqueskolaren proiektua "lehentasunezko konpromisoa da emakumeen ahotsa, lidergoa eta aliantza indartzeko, bai udaletan, bai udalerrien bizitzan".

Bestalde, Beatriz Artolazabalek, Euskadiko gobernu bateko lehenbiziko berdintasun-sailburuak, emakumeek parte-hartze publikoan eta lidergoan egindako aurrerapausoak goraipatu ditu, baina "oraindik ere zenbait urrats egiteke" daudela aitortu du.