Demokrazia eraberritzeko planaren gakoak: hedabideen erregistroa, erakundeen gardentasuna eta egiez batzordea

Hedabideen gaineko erregistroa, horien jabeei eta diru-iturriei buruzko informazioa bilduko duena, erakundeen jarduerari buruzko gardentasuna bermatzeko ekinbideak eta desinformazioari aurre egiteko lege-erreformak. Horiek dira Espainiako Gobernuaren Ministroen Kontseiluak gaur onartu duen demokrazia eraberritzeko planaren gako nagusietako batzuk.

'Demokraziaren aldeko Ekintza Plana' goiburupean, 31 neurri zehatz biltzen dituen egitasmoa onartu dute gaur, eta hurrengo hiru urteotan ezartzea aurreikusten da. Besteak beste, Sekretu Ofizialen Legea eguneratzeko proposamena dago planean jasota.

Ministroen Kontseiluaren osteko agerraldian, Felix Bolaños Presidentzia ministroak azaldu du helburu nagusiak direla "Gobernuaren jardunari buruzko informazioaren kalitatea hobetzea eta zabaltzea", "ekosistema informatiboari gardentasun, aniztasun eta berme gehiago ematea" eta "botere legegilearen zein hauteskunde sistemaren gardentasuna indartzea".

Hedabideei dagokienean, horiei erakundeek publizitatearen truke ematen dieten diru kopuruari buruzko datu zehatzak urtero publiko egitea da asmoa. Horretarako, publizitate instituzionala arautzen duen legea erreformatuko da, "gardentasun eta proportzionaltasun irizpide berriekin". Bolañosen hitzetan, "audientzien neurketa inpartzialak" bermatu nahi dira, eta "hizkuntza koofizialetan aritzen diren hedabideak babestu".

Zentzu horretan, ministroak gehitu du administrazio publikoek hedabideei bideratutako diru kopuruari "mugak" ezarri nahi zaizkiola, "administrazioen dirulaguntzen mendeko hedabiderik egon ez dadin". Hedabideen "aniztasuna" bermatzea ere bilatuko dute, laguntzak banatzerakoan.

Eragotzi nahi da diru publikoarekin albiste faltsuak zabaltzen dituzten komunikabideak finantzatzea.

Bestalde, kazetarien sekretu profesionala arautzen duen legea erreformatzea ere aurreikusten da, baita mozal legea ere. Era berean, Zigor Kodea aldatu nahi da Espainiako Koroari eginiko irainen eta erlijio sentimenduen kontrako delituak aldatzeko.  Giza Eskubideen Europako Auzitegiak bidali duen jurisprudentziara egokituko da legedia.

Legebiltzarrei eta hauteskunde-sistemari zuzendutako neurrien artean, hauteskunde eztabaidak derrigorrezkoa izatea eta hauteskunde inkestak guztiz gardenak izatea proposatu dute. Baita alderdiek finantzaketari buruzko informaziuo guztia ematea ere.

Desinformazioari aurre egitea da beste helburuetako bat, eta zentzu horretan, estrategia zehatza prestatu nahi du Gobernuak, gezurrak zabaltzen dituztenak zigortzeko. Horretarako, neurriak prestatuko dira, faltsuak diren albisteak eta nahita zabaldutako gezurrak zuzentzera derrigortzeko hedabideak. Batzorde berezitua eratuko da, albiste faltsuak atzeman eta neurriak bideratzeko.