Itxaso lanean ari da udalerriak tentsionatutako eremutzat jotzeko "deklarazioak bizkortzeko"

Denis Itxaso Etxebizitza eta Hiri Agenda sailburuak Legebiltzarreko batzordean azaldu duenez, bere saila lanean ari da Euskal Autononomia Erkidegoa eremu tentsionatu izendatzeko baldintzak betetzen dituzten udalerriek pausoak azkartu ditzaten. Itxasok aurreratu duenez, urriaren hasieran, segur aski, Errenteria izango da tentsionatu gisa izendatuko den lehen udalerria. Gainera, beste eskaera batzuk daude mahai gainean, fase desberdinetan, eta badira, "arrazoi ezberdinengatik" deklarazioa eskatzeko urratsa eman ez duten udalerriak ere.

Ohartarazi duenez, etxebizitzarena "benetako gizarte-larrialdia da gaur egun", 90.000 bizikidetza-unitate baitaude inskribatuta Etxebiden, eta bere sailak legealdi honetan sustatuko dituen jarduerak zenbatu ditu, legeek aitortzen dutenaren ildotik, etxebizitza eskuratzeko eskubide subjektiboa gauzatzeko helburuarekin.

Etxebizitza falta eta prezio altuak dira etxebizitza eskuratzeko oztopo nagusiak Itxasoren esanetan eta, hark esan duenez, prezioei eutsi ahal izateko modurik zuzenena da Estatuko legearen arabera eremu tentsionatuak izendatzea. 

Itxasok azaldu du bere saila "buru-belarri" ari dela lanean udalekin, "alokairuen prezioak mugatzea ahalbidetuko duten aitorpenak bizkortzeko".

Euskal Autonomia Erkidegoko 43 udalerrik betetzen dituzte sailkapen horretan sartzeko baldintzak; Euskal Autonomia Erkidegoko biztanleriaren % 68 bertan bizi da, 1,5 milioi pertsona inguru. Herri horiek eremu tentsionatu gisa sailkatzeak alokairuen prezioei muga jartzea ahalbidetuko luke. 

Horrez gain, Turismo Baliabideen Lurraldearen Arloko Plana idazten ari da Itxasoren Saila, Turismo Sailarekin batera. Plan horretan aurreikusten da, udal-autonomia errespetatuta, "mota desberdinetako neurri murriztaileak" ezartzea tentsionatutako eremuetako etxebizitza turistikoetan.

Itxasok adierazi duenez, "ez du zentzurik" Udal batek eremu tentsionatu izendatu nahi izatea etxebizitza-arazoak dituelako eta, aldi berean,  "pisu turistikoak ugaritzea".

Donostiarako talka-plana

Itxasok azpimarratu du arazoa larriagoa dela hiru hiriburuetan, eta, batez ere, Donostian. Gainera, deitoratu du bere sailak han esku hartzeko duen gaitasuna "orain arte ezin izan dela garatu beste bi hiriburuetako arintasun berarekin".

Legealdi honetan Txominenea auzoan 258 etxebizitza amaitu direla gogorarazi eta martxan dauden proiektuak azaldu ondoren, sailburuak azaldu du bere ustez egungo "inbertsio eta (Udalarekin dagoen) lankidetza mailarekin" ez dela "dagoen arazoari bere dimentsioaren neurrian" erantzuten.

Hori dela eta, prest agertu da "Bilbon eta Gasteizen martxan jarri diren maila eta kalitate bereko" jarduerei ekiteko Donostian ere, eta batzorde iraunkor batek monitorizatuko duen talka-plan bat hitzartzea proposatu dio Udalari.

Beste bi hiriburuei dagokienez, Bilbon 1.500 etxebizitza eraikitzeko hitzarmenak daude, eta Gasteizen 960 eraikitzeko eta 62 birgaitzeko.

Lurzoru-politika

2025-2027 aldirako Etxebizitza Bideratzeko Planak etxebizitza eskuragarria ugaritzeko aurreikusitako jarduketak bilduko ditu eta, sailburuak gogorarazi duenez, helburu horretarako berebiziko garrantzia du lurzoru-politikak. 

Ildo horretan, Eusko Jaurlaritzaren, aldundien eta udalen artean konpromisoa bultzatzeko asmoa agertu du, Euskadin dagoeneko kalifikatuta dagoen lurzorua aktibatzeko formulak bilatzeko, etxebizitza babestuak eraiki ahal izateko.

Une honetan, babes ofizialeko 75.000 etxebizitza eraikitzeko adina lurzoru dago kalifikatuta, baina "arrazoi batzuengatik edo besteengatik, blokeatuta edo lo daude".

Parke publikoa handitzeko hartu beharreko neurrien artean, salmentara ateratzen diren higiezin babestuetan probatu eta atzera egiteko eskubidea zabaltzea, sustatzaile pribatuek saldu ezin dituztenak erostea eta hutsik dauden etxeak erakartzea aipatu ditu, besteak beste.