GALen 18 biktimak gizateriaren aurkako delitua leporatuko diote Barrionuevori, haren aurkako kereilan

Estatu indarkeriaren 18 biktimak Jose Barrionuevo Espainiako Barne ministro izandakoaren aurkako kereila bat aurkeztuko dute datorren astean, Egiari Zor fundazioaren eta GEBehatokiaren (Euskal Herriko Giza Eskubideen Behatokia) babesarekin, gizateriaren aurkako delitua leporatuta.

Agerraldian hitza hartu dute Edurne Brouardek eta Bego Galdeanok (GALek hildako Santi Brouard eta Xabier Galdeanoren alabak), Maddi Bilbao eta Oscar Sanchez abokatuek eta Euskal Herriko Giza Eskubideen Behatokiko ordezkari den Agus Hernanek. Kereilak oinarritzat dituzten gertakariak Espainiako Gobernuak 80ko hamarkadan ETAren aurka abian jarritako ZEN Planaren baitan kokatzen dira.

Barrionuevo izan zen ZEN Planaren "arduradun nagusietako bat", berak 2022an Espainiako hedabide bati egindako elkarrizketan aitortu bezala.

Oscar Sanchez eta Maddi Bilbao abokatuek azaldu dutenez, "froga oso sendoak" dituzte, eta, besteak beste, Felipe Gonzalez Espainiako gobernuburu izandakoak eta Baltasar Garzon Auzitegi Nazionaleko epaile ohiak deklaratzea proposatuko dute.

Abokatuen iritziz, ZEN planaren baitan kokatutako ekintzak eta GALen ondorengo jardunari lotutako delituak ez dira preskribatu.

Halaber, Auzitegi Nazionalak kereila atzera botaz gero, nazioarteko instantzietara joko dutela iragarri dute.

_______________________________________________________________________________________________________

ZURE INTERESEKOA IZAN DAITEKE: Barrionuevok Estatu Terrorismoa aitortu du El Pais hedabideak egindako elkarrizketa batean

_______________________________________________________________________________________________________

Brouardek eta Galdeanok espero dute bide judizialak "atea irekiko" duela estatu indarkeriak eragindako "gertakariak eta erantzukizunak argitzeko" eta "Barrionuevo Peña bezalako pertsonaia batzuk diren bezala pasa daitezen historiara, giza eskubideak urratzeko gobernu-boterea zein botere politikoa erabili zituzten benetako kriminalak".

"Egiak ez du preskribatzen, ezta minak ere. Barrionuevok, beste batzuek bezala, kontatu duena baino gehiago daki. Espero dugu hau aukera bat izatea auzitegi batek inork bere gain hartu ez dituen erantzukizunak ezarri eta adierazi ahal izateko", azpimarratu dute.

Kereila aurkeztu dutenen ordezkariek onartu dute ez dela "erabaki erraza izan", ez baitu gaurdaino justiziak "gauza handirik egin gertakari horien guztien egiara iristeko, ez arduradunak seinalatzeko, ezta erantzukizun mailak ezartzeko ere; kontrakoa baizik".

Are gehiago, nabarmendu dute Giza Eskubideen Behatokiaren "bultzada" izan dela eszenatoki horretara eraman dituena. Horrekin batera, gogora ekarri dute bere garaian Urkullu lehendakariak "laguntza ekonomikoa" eskaini ziela, baina orduan erabaki zutela "egoeraren balorazio juridikoa egitea" eta Barrionuevoren aurka prozesu bat irekitzeko "benetako aukerak" aztertzea. 

Ildo berean, uste dute esku hartu behar dutela "Estatuko aparatuetatik egindako krimenak zuritzeko eta justifikatzeko saiakera horiei amaiera emateko".

Kereila aurkeztuko dutenen zerrenda

1. Edurne Brouard Aldamiz. Santi Brouarden alaba. GALek hil zion aita, 1984an

2. Bego Galdeano Prieto. Xabier Galdeanoren alaba. GALek hil zion aita, 1985ean

3. Lourdes Oñederra Bergara. Ramon Oñederraren arreba. GALek hil zion anaia, 1983an

4. Arantza Oñederra Bergara. Ramon Oñederraren arreba

5. Izaskun Ugarte Begoña. Mikel Goikoetxea Elorriagaren alarguna. GALek hil zion senarra, 1984an

6. Josu Amantes Arnaiz. GALek larri zauritu zuen, 1985ean

7. Axun Lasa Arostegi. Joxean Lasaren arreba. GALek bahitu, torturatu eta hil zion anaia, 1983an

8. Joseba Lasa Jauregi. Joxean Lasaren iloba

9. Peli Aldatz Moran. Fernando Egileorren alarguna. GAL hura hiltzen saiatu zen 1985ean. Espainiaratu egin zuten Frantziatik 1986an, eta torturak salatu zituen

10. Gorka Egileor Aldatz. Fernando Egileorren semea

11. Amaia Egileor Aldatz. Fernando Egileorren alaba

12. Izaskun Rekalde. Morbihan (Frantzia) bizitzeko agindua ezarri zioten 1987an

13 Peio Aizpurua Arbelaitz. Dionisio Aizpuruaren anaia. Poliziak hil zion anaia, Pasaian, 1984an

14. David Isart Badiola. Pedro Maria Isarten anaia. Poliziak hil zion anaia, Pasaian, 1984an

15. Francisco Javier Izura Sanz. Jose Mari Izura Sanzen anaia. Poliziak hil zion anaia, Pasaian, 1984an

16. Carlos Delas Aizkorbe. Rafael Delas Aizkorberen anaia. Poliziak hil zion anaia, Pasaian, 1984an

17. Bixen Mujika Mendiondo. Eugenio Aranburu Garmendiaren alarguna. Cabo Verdera deportatu zuten senarra, 1985ean

18. Maider Garcia Martin. Juan Carlos Garcia Goenaren alaba. GALek hil zion aita, 1987an