EAJk "nazioa egiteko" deia egin du Aberri Egunean eta EH Bilduk "euskal errepublika" lortzekoa

EAJk "herri eta nazio gehiago egiteko" deia egin die euskal herritarrei gaur Bilbon ospatu duen Aberri Egunean, Euskadik mundu mailan gertatzen ari diren aldaketa "azkarrekin" bizi duen "bidegurutzean" aurrera egin dezan. EH Bilduk, berriz, "berdinen arteko euskal errepublika baterantz jauzi berri bat" egiteko deia egin du Iruñean, "historikotzat" jotzen duen une honetan.

Jeltzaleek Bilboko Plaza Berrian bildu dituzte agintariak, erakundeetako ordezkariak, afiliatuak eta jarraitzaileak, 11:30ean 'Euskadi Gara. Mundialak gara!' lelopean egin duen ekitaldian. Aurpegi "berriak" izan dira, gainera, oholtzan; izan ere, bertan izan da Aitor Esteban, EBBko presidente hautatu berria, eta Imanol Pradales, lehendakari berria. Olatz Urizar EGI EAJko gazteen antolakuntzako burua izan dute lagun. 

Estebanek herritarri dei egin die "euskal herritarrak garen aldetik Euskadi deitzen den herri ederra dugula ospatzera, gure nortasunari tinko eusten diogula eta legatu hau gure alaba eta semeei uzteko asmoa dugula".

Aberri Eguna "poz eta itxaropenez" betetako eguna dela esan du, "inguruan dugun munduaren iluntasunaren" aurrean. "Iraganean ere, herri gisa, momentu arriskutsuak bizi izan ditugu, gaurkoak baino txarragoak eta, hala eta guztiz ere, hemen jarraitzen dugu eta jarraituko dugu, gure hizkuntzarekin eta gure nazio nortasunarekin, ez izan zalantzarik", esan du.

EH Bildu Iruñean bildu da

EH Bilduk Iruñean ospatu du aurten ere Aberri Eguna 'Askatasunaren nazioa gara' lelopean, manifestazio eta jai egitarau zabalarekin, haur animazioarekin eta Izaki Gardenak, Belako eta Trikidantz taldeen kontzertuekin. Aldarrikapen martxa 12:00etan abiatu da Golem zinemetatik, eta Antoniutti parkean amaitu da. Amaierako ekitaldi politikoan hitza hartu dute Joseba Asiron alkateak eta Arnaldo Otegi alderdi subiranistaren buruak. 

EH Bilduko idazkari nagusiak adierazi du euskal nazioa aukera baten aurrean dagoela. "Iraganean ez genuen aukera guztiak aprobetxatzen jakin. Ez datza orain, eta ez dugu aztertu behar nork izan zuen erantzukizun hori, baina herrialde txikia gara, eta gauza handiak egin ditu. Burujabetza nazionala eraikitzeko bidean aurrera egiteko inteligentzia politikoarekin jolasten jakin behar dugu".

Horregatik, eskua luzatu dio "herri honek errekonozimendu nazional handiagoa, bere hizkuntzaren defentsa edo bestelako gizarte bat" merezi duela uste duenari, bide hori elkarrekin eraikitzeko.

"Nazioaren ikuspegitik eta, gure ustez, bide hori batasunetik egin behar dugu. Irainen aurrean, eskua luzatuta, mespretxuen aurrean, hemen dago ezker independentista partida bat termino estrategikoetan jokatzeko prest, ez epe motzean, baizik eta horizontera begira, Berdinen arteko Euskal Errepublika deitzen dena", adierazi du Otegik.

EH Baik Donibane Garazin ospatu du Aberri Eguna

Ipar Euskal Herriko Mugimendu abertzalea osatzen duten eragile, sektore eta herritarrek indarrak batuta eta norabide berean aritu behar dutela nabarmendu dute Donibane Garazin ospatu duten Aberri Egunean, ezinbestekoa delako haien hitzetan "proiektu eraldatzaile, euskaltzale eta abertzalea zabaltzeko".

"Pertsonetan eta eskubideen errespetuan" oinarritutako aberrien alde egin dute Sumarrek eta Podemosek

Sumar Mugimenduak eta EAEko Podemosek ere ohar bana kaleratu dute Aberri Egunaren harira.

Aberri Egunaren kariaz, "mistikoa" ez den euskal aberri bat aldarrikatu du Sumarrek, "bandera baztertzailerik" gabekoa, eta "ahots berriei eta jabetza modu berriei bideak irekitzen diona", alegia, "ezein alderdiren ondasun" ez dena. Halaber, eskubideen alde egiten duen Estatu berri bat defendatu du, Euskadi nazio gisa aitortuz, eta "komuna dena blindatuz".

Bestalde, Podemos Euskadik "jendearen" eta "herriaren" aberrien alde egin du, "eskubide sozialen defentsa" egin ere; mugetatik, banderetatik edo berezko pribilegioetatik harago". Alderdi moreak nabarmendu nahi izan du "aberri hitzak ez duela soilik adiera nazionalista edo abertzalea".