Aberrigintzaren bidean EAJren lidergoa aldarrikatu du Aitor Estebanek

Aberri Eguna ospatu du EAJk Bilboko Plaza Berrian. "Euskadi gara, Mundialak gara!" lelopean, Aitor Esteban EBBren buruak Eusko Alderdi Jeltzaleak aberrigintzaren bidean izandako papera aldarrikatu du.

Egun berezia izan da gaurkoa Aitor Estebanentzat eta Imanol Pradalesentzat, alderdiaren buru eta lehendakari moduan bizi izan duten lehen Aberri Eguna izan baita. Ekitaldian Olatz Urizar EGIkideak ere parte hartu du.

EAJk aberrigintza egiteko izan duen papera aldarrikatu du hitzaldian Aitor Estebanek. EAJri Kontzertu Ekonomikoaren eguneratzea, Trenbideen transferentzia edo Kostaldeen eskumena egotzi ondoren, besteak beste, honako hau eskatu du: "Ez diezagutela esan, nori eta guri, nazio anbizioa zer den". "Alderdi honek nazio anbizioa egunez egun, urtez urte erakutsi du 40 urte luzetan, 130 urtetan, aurrera eginez eta gurpiletan zotzak jarri gabe", gaineratu du.

Gainera Estebanek herritarri dei egin die "euskal herritarrak garen aldetik Euskadi deitzen den herri ederra dugula ospatzera, gure nortasunari tinko eusten diogula eta legatu hau gure alaba eta semeei uzteko asmoa dugula".

Aberri Eguna "poz eta itxaropenez" betetako eguna dela esan du, "inguruan dugun munduaren iluntasunaren" aurrean. "Iraganean ere, herri gisa, momentu arriskutsuak bizi izan ditugu, gaurkoak baino txarragoak eta, hala eta guztiz ere, hemen jarraitzen dugu eta jarraituko dugu, gure hizkuntzarekin eta gure nazio nortasunarekin, ez izan zalantzarik", esan du.

Autogobernuaren defentsa

Imanol Pradales lehendakaria Espainiako gobernuari zuzendu zaio. Gernikako Estatutua bete dezala eta "azkar" bete dezala eskatu dio, adostutako eskumenen esku aldaketa lehenbailehen gauzatuz.

Pradalesek autogobernua defendatu du, jasandako erasoen aurrean. Euskadi "nazioa" dela aldarrikatu du eta "aldebikotasuna bermatuko duen markoa segurtatu" behar duela adierazi du "berme-sistema eraginkor batez, adostutako autogobernua higatu edo mugatuko duten aldebakarreko erabakiak eragotziko dituena".

Eta horren adibide, "unibertsitateko tituluak homologatzeko dugun eskumena baliogabetu duen Gorenaren epaia" aipatu du, "lehen aldiz, ahalmenik ez duen auzitegi batek aldebiko itun politiko baten aurkako epaia eman du. Eta hori oso larria da!", ohartarazi du.

Pradalesek EH Bilduren jarrera ere kritikatu ditu, baina zuzenean aipatu gabe. Besteak beste, esan du ez duela baloratu nahi "zein diren euren nazioarteko aliatuak, ezta Errusiak Ukrainan egindako inbasioa gaitzesteko izan dituen zalantzak eta erreserbak ere".

Era beran, "interes alderdikoi hutsengatik" euskal gizartean gerta daitekeen "polarizazioarekin" kezkatuta agertu da, "batzera baino gehiago zatitzera ohituta egon den kultura politiko bati" erreferentzia eginez.

Azkenik, Euskadirekin eta demokraziarekin eta etorkizunarekin konprometitzeko eskatu die gazteei lehendakariak, "ez baitaude ziurtatuta", "intransigentzia eta autoritarismo garaiak bizi ditugun honetan", ohartarazi du.