Sanchez: "Feijook eta Abascalek gobernatu nahi badute zentsura-mozioa lehenbailehen aurkez dezatela"

Pedro Sanchez Espainiako Gobernuko presidenteak zentsura-mozioa "lehenbailehen" aurkezteko erronka bota die Alberto Nuñez Feijoo PPko buruzagiari eta Santiago Abascal Voxeko buruari, baldin eta koalizio Gobernuak gehiengo parlamentarioa galdu duela hain ziur badaude.

PSOEren Zuzendaritza Federala bildu ostean emandako prentsaurrekoan, Sanchezek azpimarratu du demokratikoena ez dela aurkaria dimititzera behartzea "egia batzuekin eta gezur askorekin", baizik eta gehiengo parlamentario alternatibo bat artikulatzea eta zer herri proiektu duten azaltzea.

Lehenbailehen egiteko aholkatu die Feijoo eta Abascali, uda ostean PPren "auzi ugariei" buruzko ebazpenak eman daitezkeelako eta "benetako delitugileak nortzuk diren ikusiko delako". "Hauteskundeak lau urtean behin dira, horrela izan da eta hala izaten jarraituko du", nabarmendu du. "Nire betebeharra, kapitain gisa, lema hartzea eta koalizio gobernu aurrerakoia babestea da", gaineratu du.

Gainera, Espainiako Gobernuko presidente eta PSOEko agintariak ziurtatu duenez, bere alderdia "erakunde garbia" da, eta ez du inoiz PPk eta Voxek bezala jokatuko ustelkeriaren alorrean, eta, beraz, "ez ditu salatzaileak jazarriko, ezta frogak mailukadaz suntsituko ere".

Santos Cerdan UCOren txosten baten ondorioz Antolakuntza idazkari kargua utzi eta gero, alderdiko zuzendaritzaren lehen bileraren ostean PSOEren egoitza federalean eskaini duen prentsaurrekoan alderaketa hori egin du Sanchezek.

"PSOE erakunde garbia da, eta, zuzentzeko ohorea dudanetik, hau da orain arte nire erakundeari eragiten dion ustezko ustelkeria kasu bakarra", azpimarratu du egoerari erreferentzia eginez. "Akatsak egin ditzakegu, traizioak jasan, baina PSOE erakunde garbia da", berretsi du.

Ikerketa batzordea eta Kongresuan agerraldia

Bestalde, Sanchezek iragarri du ikerketa batzorde bat bultzatuko duela Diputatuen Kongresuan, "Koldo auziari buruzko egia ezagutzeko", eta, gainera, agerraldia egingo du Behe Ganberan, gai horri buruzko azalpenak emateko.

Sanchezek esan du ahal den lehen egunean agertuko dela Kongresuan, "beharrezko azalpenak emateko eta talde parlamentario guztien galderei erantzuteko", adierazi du.

Gainera, PSOEko buruzagiak salatu du herriko etxeei "berriro eraso dietela asteburuan". Hala, Sanchezek gaitzespen publikoa eskatu die hedabideei, PPri eta Voxi, "gure herriko etxeak sistematikoki jasaten ari diren erasoen aurrean".

Matxismoa

Azkenik, Jose Luis Abalos ministro ohiaren eta haren aholkulari izandako Koldo Garciaren arteko audioen aurrean, "nazka" eta "haserrea" azaldu ditu Espainiako gobernuburuak zuzendaritza sozialistaren izenean.

"Erabat bateraezinak dira erakunde honen balio feministekin eta alderdi gisa dugun nortasunarekin", esan du Sanchezek. Testuinguru horretan, sozialisten burua "bereziki" emakumeei zuzendu zaie, Abalosen eta Koldoren audioak aipatuz, non emakumeak trukatzeaz hitz egiten duten. "Nazka ematen digute (...) Batzorde Federalaren aho bateko sentimendua da", erantsi du.