1978ko sanferminetako dokumentuak desklasifikatzeko eskatu du Kongresuak

Diputatuen Kongresuko Osoko Bilkurak EH Bilduk bultzatu eta PSOE eta Sumarrekin adostu duen ekimena onartu du ostegun honetan. 1978ko sanferminetan gertatutako Poliziaren kargak argitzea, horiei buruzko dokumentuak desklasifikatzea eta gertakarietan hil ziren German Rodriguez eta Joseba Barandiaran biktima gisa aitortzea eskatzen dio Gobernuari onartutako proposamenak.

Ekimenak aurrera egin du Kongresuan ordezkatutako alderdi gehienen aldeko botoarekin. PPk eta Voxek aurka bozkatu dute eta UPNk abstentzioa eman du.

Onartutako proposamen horretan, “gertatutakoa argitzen laguntzeko” konpromisoa jasotzen da “Gobernuak dituen gaitasunak erabiliz”.

Era berean, Nafarroako Gobernuarekin eta Parlamentuarekin lan egin eta foru erkidegotik egindako eskaerari erantzutera bultzatu nahi da, “gai, egintza, dokumentu, datu eta objektuak eskuragarri jartzeari dagokionez”.

Gainera, 1968ko Sekretu Ofizialen Legea aldatzeko prozesuari ekitea eskatzen zaio Gobernuari, "gardentasunean oinarritutako esparru juridiko berri baterantz aurrera eginez eta horretarako, dokumentazioa desklasifikatzea ahalbidetuz, hainbat egoera eta gertakariri buruzko egia argitzeko eta ezagutzeko, hala nola, 78ko sanferminei buruzkoa".

Antzerako gertakarien inguruko beste prozesu batzuetan laguntzera eta biktimak aitortzera ere bultzatzen du Gobernua; hala nola, Gasteizen 1976ko martxoaren 3an Poliziak langileen aurka egin eta 5 lagun hil ziren gertakarien ikerketan. 

1978ko uztailaren 8 hartan, Iruñea sanferminetan bete betean murgilduta zegoen. Polizia Nazionala Iruñeko zezen-plazan sartu zen bertan zegoen pankarta baten harira, eta istiluak hasi ziren. Ondoren, liskarrek hiriko kaleetan jarraitu zuten. German Rodriguez gaztea tirokatuta hil zen eta beste sei pertsona zauritu ziren. Handik egun batzuetara, uztailaren 11n, beste gazte bat, Joseba Barandiaran, hil zen tirokatuta Donostian, Iruñean gertatutakoa salatzeko egin zen manifestazioan.

Garai hartan bi sumario judizial ireki ziren, baina ezetsi egin ziren eta 1983an behin-behinean artxibatu ziren. Froga edo testigantza berriak aurkeztuz gero, berriz ere zabaldu ahal izango lirateke. Memoriaren aldeko elkarteek eta Nafarroako erakundeek urteak daramatzate gertakari haiekin lotutako dokumentuak argitara emateko eskatzen.