Osasun sistema publikoaren egitura berrantolatu du Jaurlaritzak, bost izendapen berrirekin 

Imanol Pradales lehendakaria buru duen Eusko Jaurlaritzak urtebete bete duen honetan, Alberto Martinez Osasun sailburuak Osasun Sailaren egitura eta Osakidetzako egitura aldatu ditu, lidergo eta profil berriekin, "arreta modernizatua" eta "kalitatezko zerbitzua" bermatzeko asmoz.

Osasun sailburuak berak eman ditu azalpenak gobernu bileraren osteko prentsaurrekoan. Zehazki, bi sailburuordetzak berregituratu eta bost izendapen berri egin ditu, "pausoak eman diren arren, agerikoa delako aldaketa eta hobekuntza prozesuak azkartu behar ditugula". 

Hauek dira aldaketa nagusiak:

Gontzal Tamayo Medel, Osasun sailburuorde berria

Osasun sailburuordetza zena Osasun arloko Eraldaketa Digitala eta Emaitzak izatera igaroko da. Halaber, Gontzal Tamayo Medel izango da sailburuorde berria, Enrique Peiroren ordez, eta Ines Gallego Camiña batuko da taldera Osasun transformaziorako zuzendari bezala.

Gontzal Tamayo Medel transformazio digitalaren alorrean erreferente da eta orain arte Eraldaketa, Plangintza eta Digitalizaziorako zuzendaria izan da. Osasun Sailak Tamayok kargurako dituen lidergo gaitasuna eta profil berritzailea nabarmendu ditu, osasun emaitzak eta etengabeko hobekuntza oinarri hartuta, osasun sistema publikoaren transformazioari ekiteko. 

Ines Gallego Camiña, Osasun arloko eraldaketa: Analisia, Plangintza eta Herritarren Parte hartzea zuzendaritzaren buru

Gurutzetako ospitaleko berrikuntza zuzendariordea izateari utziko dio Ines Gallego Camiñak eta Tamayoren taldean sartuko da, berrikuntzan, kalitatean eta pertsonengan oinarritutako osasun arretaren aldeko apustua indartzeko asmoz.

Aritz Uriarte Fuertes, Osasun arloko Gobernantza eta Jasangarritasunerako sailburuordea

Osasun Sailak osasun sistemaren kudeaketa jasangarriago eta zorrotzago baterako bidean, Administrazio eta Finantzaketa Sanitarioko sailburuordetza berrantolatu du. Aurrerantzean, Osasun Arloko Osasun arloko Gobernantza eta Jasangarritasunerako sailburuordetza izatera pasatuko da.

Etapa berri hau gidatzeko asmoz, Aritz Uriarte Fuertes aukeratu dute. Enpresen Administrazioan eta Zuzendaritzan EHUn lizentziatua, 2017an sektore publikora jauzi egin zuen eta geroztik Azpiegiturak sozietate publikoan lan egin du, finantza, ekonomia eta zerbitzu korporatiboen departamentuak zuzenduz.

Lorea Bilbao Artetxe, Osakidetzako zuzendari nagusia

Osasun sistema publikoaren erronkei aurre egiteko esperientziaren aldeko apustua egin du Eusko Jaurlaritzak, Osakidetzako zuzendari nagusi kargurako Lorea Bilbao Artetxe hautatuta. 

Izan ere, orain arte Administrazio eta Osasun finantzarioko sailburuorde zenak Osakidetzara jauzi egingo du. Osasun Itunaren inguruko ezagutza handia du eta gerentzian ibilbide luzea egindakoa da. 

Maite Martinez de Albeniz Zabaleta, Donostialdeko ESIko zuzendari gerentea

Azkenik, Maite Martinez de Albeniz Zabaleta aukeratu dute Donostialdeko ESIko zuzendari gerente kargurako. Martinez de Albeniz doktorea neurologoa da, gaixotasun zerebrobaskularretan aditua, eta azken urtean, Osakidetzako Asistentzia Sanitarioko zuzendari gisa jardun du, eta ikuspegi eguneratua eta estrategikoa eman dio erakundeari.