Pedro Sanchezek eskatu du Israelek ez dezala inolako kirol lehiaketatan parte hartu "basakeriak irauten duen bitartean"

Gazan "basakeriak irauten duen bitartean" Israelek nazioarteko kirol lehiaketetan parte hartu ezin izatea eskatu du astelehen honetan Pedro Sanchez Gobernuko presidenteak.

Diputatuen Kongresuan parlamentu arteko batzordearen bileran, diputatu, senatari eta europarlamentari sozialisten aurrean, Sanchezek ezinegona erakutsi du lehen Ukrainaren inbasioaren ostean Errusia kanporatu zen gisan, ez delako orain gauza bera egiten Israelekin.

"Gure jarrera argia eta irmoa da, basakeria amaitu arte, ez Errusiak ez Israelek ez dute nazioarteko lehiaketa bakar bat gehiagotan ere parte hartu behar", adierazi du Madrilen, Espainiako Vueltako azken etapan izandako istiluen biharamunean. Izan ere, Igandean , bertan behera utzi behar izan zuten Vueltako amaiera, eta bi atxilotu eta hogei bat polizia zauritu ziren ibilbidean zehar izandako protestetan.

Sanchezek beti arbuiatu du indarkeria, baina, azpimarratu duenez, igandean hiriburuan bizitakoaren ostean, "injustiziaren aurka mobilizatzen den" eta "modu baketsuan" bere ideiak defendatzen dituen Espainiako gizarte zibilarekiko "miresmen eta errespetu sakona" sentitzen du. 

Sanchezek astelehen honetan erakutsitako jarrerabat dator joan den maiatzean Eurovision Jaialdiaren harira esandakoekin, Israel musika-lehiaketatik at uztea defendatu baitzuen, Errusiarekin egin zen bezala, baita antzeko beste ekitaldi batzuetatik ere.

Israel ekitaldietatik kanpo uzteko eskatu du Diazek

Yolanda Diaz Espainiako Gobernuko bigarren presidenteorde eta Sumarreko buruzagiak Espainiako Vuelta gelditzea lortu zuten mobilizazioak goraipatu ditu astelehen honetan, eta azpimarratu duenez, "Israelek ezin du ez Eurovisionen ez beste edozein lekutan normaltasunez parte hartu Palestinan genozidio bat betikotzen ari den bitartean".

Diazen iritziz, Espainian zehar egunotan egin diren gizarte zibilaren mobilizazioak "duintasunaren eredu dira, hemen eta munduan", eta klase politikoak eta buruzagiek horien mailan jarri behar dira. 

Testuinguru horretan, PPren aurka egin du, "lotsa izpirik gabe, Gazan ez beste leku guztietan indarkeria ikusten duelako", eta Alberto Nuñez Feijoo kritikatu du, Gazan 65.000 hilketa baino gehiago izan ondoren ez delako gai "genozidioa gaitzesteko". 

"Feijoo eta Abascal Netanyahurekin lerrokatzen diren bitartean, gizarte zibila Palestinaren eta giza eskubideen alde jartzen da", adierazi du Diazek. Diazek uste du gazteek lezio bat eman dietela apatikotzat edo erreakzionariotzat jotzen dituztenei.