Hauteskundeak, Andaluzian: zer du jokoan alderdi bakoitzak M17an?

Andaluziako Parlamenturako hauteskunde autonomikoak gainean dira jada, igandean, maiatzaren 17an, bozkatu behar baitute andaluziarrek. 2018tik presidente den Juanma Morenoren Alderdi Popularra jotzen dute garaile inkestek. 

Orotara 27 alderdi eta koalizio aurkeztu dira, baina horietatik 13 lehiatuko dira barruti guztietan. Nolanahi ere, norgehiagoka nagusia 5 alderdiren artekoa izango da: PP, PSOE, Vox, Por Andalucia eta Adelante Andalucia. 

Gauerdian amaituko da kanpaina, eta hasi bezala amaituko da, panorama politiko ireki batekin. Gaur, kanpainako itxiera ekitaldietan, azken mezu eta deiak entzungo dira. 

Baina, zer du jokoan talde bakoitzak? Jarraian, gako nagusiak.

Moreno, gehiengo osoaren bila

Inkesta guztien arabera, Juanma Moreno PPko hautagai eta 2018tik Andaluziako presidente denak erraz irabaziko ditu hauteskundeak, baina ikusteko dago gehiengo osoaren langara iritsiko den, horren arabera asko aldatuko baita egoera politikoa. 

Zalantzarik gabe, Morenoren helburua gehiengoa lortzea da, kontrako agertokiak Voxen esanetara jartzea esan nahiko bailuke. Buruzagi popularrak bakar-bakarrik gobernatu nahi du. 

Alderdi ultraeskuindarrak jada ohartarazi du Extremaduran edota Aragoin mahai gainean jarritako baldintza berberak jarriko dituela Andaluzian, eta, noski, "lehentasun nazionala" izango dela horien artean.  

PPren barruan profil moderatua duen buruzagia, ultraeskuindarren ideietatik urruntzen ahalegindu da, baina 2018an haiekin akordioa adostuta iritsi zen presidente kargura. 

Montero, PSOEk Andaluzian galdutako boto-emaileen atzetik

Inkesten haizea kontra duela iritsiko da hauteskunde egunera Maria Jesus Montero PSOEren hautagaia. Aurreikuspenek diote ez dituela hobetuko 2022ko bozetako emaitzak; 30 eserleku lortu zituzten orduan sozialistek Andaluzian. 

Egoera irauli eta indarra erakusteko, azken urteotan PSOEk Andaluzian galdu dituen boto-emaileak berreskuratzeko itxaropena du Monterok. 

Espainiako Gobernuan zituen presidenteorde lehen eta Ogasun ministro karguak utzi zituen Andaluzian hautagai izateko. Aurreikuspen guztiak hautsi eta emaitzak hobetzea lortuko balu ere, ezkerreko beste alderdiekin hitz egin beharko luke. Nolanahi ere, galdeketa bakar batek ere ez du agertoki hori iragarri. 

Voxek giltza eskuratu nahi du

Eskuin muturreko alderdiaren helburua bakarra da: Morenok gehiengo osoa ez lortzea. Horrela, Andaluziako politika munduan indarra hartuko luke Voxek, eta giltza eskuan izango luke, datozen lau urteotarako Andaluziako Gobernuan. 

Manuel Gavira da Voxen hautagaia, eta Extremadurako eta Aragoiko formula du buruan: alderdiaren goranzko joerari eustea eta Andaluziako Gobernuan erabakigarria izatea. 

Por Andalucia, ezkerreko frontearen apustua

Eskuinari aurre egiteko, Espainiako Estatuko ezkerreko taldeak fronte handi bat osatzeko ahaleginetan ari diren honetan, Andaluzian apustu hori probatuko du Por Andaluciak. Besteak beste, IU, Sumar Mugimendua edota Podemos batzen dituen koalizioa da, eta Andonio Maillo IUko kidea du hautagai. 

Egungo ordezkaritza bikoiztu eta gutxienez 10 diputatu lortzea da horien asmoa, eta ez dute baztertzen gobernura iristea, ezkerreko beste taldeekin batera. Dena dela, inkesten arabera, orain lau urteko emaitzak berdinduko dituzte, edo, kasurik onenean, zerbait hobetu. 

Adelante Andalucia, goraka

Goranzko bidean eta galdeketetan aurreikuspenak alde dituela helduko da M17ko hitzordura Jose Ignacio Garcia Adelante Andaluciako hautagaia. 

PSOEren ezkerretara kokatzen du bere burua alderdi honek, eta izaera propioari eutsi nahi dio, estatu mailako taldeen egituretatik bereizita. Andaluziarren nortasuna du ikur.

Egun 2 diputatu bakarrik ditu Adelante Andaluciak, baina, inkesten arabera, oso litekeena da Por Andaluciari aurrea hartu eta laugarren indarra izatea  hurrengo legegintzaldian hauteskunde hauen ostean.