Morkaiko mendiko gurutzea eraitsi dute

Morkaiko mendiaren gailurrean zegoen gurutzea eraitsi dute bart, Eusko Jaurlaritzako Segurtasun Sailak jakinarazi duenez. 

Zementuzko gurutzea Gerra Zibilean Morkaikon hil zen Carlos de Borbon y Orleans zenaren omenez (Juan Carlos I.aren osaba) eraiki zuten. 

Atzo Elgoibarko Udaltzaingoak eman zuen abisua, 22:23ak aldera, eta horren berri izan ondotik Ertzaintzaren patruila bat gerturatu zen tokira. 

Agenteek gurutzea lurrean zegoela egiaztatu zuten, baina ez zuten inguruan inor ikusi. 

Gurutzea eraistearekin batera "Xake mate Borbon, duintasuna mendi tontorrean" idatzi dute monumentuaren oinarrian. 

Ertzaintzak ikerketa abiatu du gertaturikoa argitzeko, baina oraingoz ez dute inor atxilotu. 

Gogora Memoriaren, Bizikidetzaren eta Giza Eskubideen Institutuak kendu beharreko sinbologia frankisten artean gehitu zuen 2019an egindako txostenean, baina oraindik zutik jarraitzen zuen. Elgoibar 1936 kolektiboak sare sozialetan nabarmendu duenez, "Udalaren betebeharra zen ikur hau kentzea". 

Elgoibarko Udalak bozeramaile batzordearen premiazko bilera deitu du 13:30ean. 

"Ez da erregimen frankistaren gorespen leku bat"

Elgoibarko Udalak Bozeramaileen Batzordea deitu du gaur arratsalderako, gertatutakoa aztertu eta aurrera begirako urratsak erabakitzeko. Agiri batean zehaztu duenez, egun, "elgoibartarrentzat, Morkaikuko gurutzea ez da erregimen frankistaren oroitzapen edo gorespen leku bat",  "mendizaletasunarekin identifikatzen" duten herriko "beste ikur bat" baizik. 

EAJk zuzentzen duen Udalak gogora ekarri du "urteak" daramatzala "memoria historiko eta demokratikoa" lantzen, eta helburua beti izen dela "gurutze horren esanahia aldatzea".  Horregatik, zehaztu dute oharrean,  "idazkuna kendu zitzaion eta gurutze hutsa utzi, garaiko gertakarien lekuko soil bezala”. 

Udalaren hitzetan, adituen gomendio teknikoen arabera, Elgoibarko memoria demokratikoa berreskuratzeko egokiagotzat jotzen da gurutzea ez eraistea. "Hori kontutan izanik, lanketaren aldeko apustua egin da. Gurutzeari esanahi berritua emango dion panel bat jartzea planteatuz, eta Memoriaren Ibilbidearen esparruan txertatzeko apustua egin nahi izan da", dio oharrak. 

Halaber,  "gurutzeak, bere tamainak eta Zirardamendiko hobien aurrean kokatzeak Gerraren izugarrikeriaren neurriaren eta erregimen frankistaren izaera totalitarioaren irudia" eskaintzen duelakoan daude udal-arduradunak. “Hori kentzeak errealitate hori ezabatzea edo, gutxienez, indargabetzea ekartzen du".