Eusko Jaurlaritzak 1.600 milioi inbertituko ditu 2032ra bitartean Osakidetzako azpiegituretan eta ekipamenduan

Eusko Jaurlaritzak 2025-2032 urteetarako Azpiegitura eta Ekipamendu Sanitarioen Programa aurkeztu du gaur, “asmo handiko” proiektua, “kalitatea, segurtasuna eta hurbiltasuna” bermatzea helburu, “osasun-arretako pazienteak eta osasun-arloko profesionalak ahalik eta ondoen” egon ditzaten. 

Hala adierazi dute Jaurlaritzako eta Osakidetzako arduradunek goizean Txagorritxu-AUOn egin duten ekitaldian. Bertan izan dira, Imanol Pradales lehendakariaz gain, Alberto Martinez Osasun sailburua, Gontzal Tamayo Osasun sailburuordea eta Lore Bilbao Osakidetzaren zuzendari nagusia.

Programa horren bitartez, 1.600 milioi euroko inbertsioa egingo da 2025-2032 aldian, eta horren % 70 azpiegiturak egin eta berritzera bideratuko da.  

Lehen Mailako Arretari dagokionez, 21 osasun-zentro eraikiko 8 eraberritu edo handituko dira, guztira, 200,8 milioi euro inbertituta.

Arlo horretan nabarmentzekoa da Erabakimen Handiko Durangoko Zentroa, 34,8 milioiko inbertsioa izango duena. Zentro horren bitartez herritarrei zerbitzu espezializatu gehiago emango zaie, eta joan-etorriak saihesten lagunduko du. Izan ere, gaur egun hiru gunetan egiten den jarduera asistentziala zentro bakarrean bilduko du, Durangoko Landako osasun-zentroarena, anbulatorioarena eta osasun mentaleko eguneko ospitalearena.

Era berean, 11,3 milioi euro bideratuko dira mediku-kontsultetako ekipamendua modernizatzeko lanetara, ohatila altxagarri, ekografo, desfibriladore erdiautomatiko eta bestelako ekipoekin behar bezala hornitzeko.  

Garrantzi handiko lanak Ospitale Sarean

Ospitaleko arretaren eremuan, Jaurlaritzak 842,7 milioi euroko inbertsioa egitea aurreikusi du, datozen urteotan ekipamenduak eraikitzeko eta egungoak handitzeko eta modernizatzeko. 

Nabarmentzekoak dira, esaterako, Tolosan eraikiko den ospitalea (107 milioiko inbertsioa). 74 ohe eta 3 bloke kirurgiko izango ditu, eta, agintarien esanetan, Gipuzkoa osoan erreferentziazkoa izango da prozedura diagnostikoetarako eta proba osagarrietarako. 

Halaber, Basurtuko, Galdakao-Usansoloko, Donostiako eta Gurutzetako ospitaleetan kanpo-kontsultetarako eraikin bana eraikiko da, ingresuetarako eraikinetatik bereizita, Txagorritxuko ereduari jarraiki, anbulatorioko pazienteak eta ospitaleratutakoak arreta-zirkuitu desberdinetatik bideratzeko. Eraikin horiek egiteko 344,5 milioiko inbertsioa aurreikusi da, guztira, baina Galdakao, Donostia eta Gurutzetako lanak 2032a arte ez direla amaituko argitu du Jaurlaritzak. 

Horiez gain handitze- eta eraberritze-lan handiak egingo dira, besteak beste, Zumarragako, Bidasoko eta Txagorritxuko ospitaleetan. 

Ospitaleko arretako inbertsioen atalaren barruan Prontoterapiako Unitate berria nabarmendu du Jaurlaritzak. Izan ere, Donostiako Unibertsitate Ospitalearen mende egongo den instalazio horri esker, Osakidetza tratamendu onkologiko espezializatu eta aurreratu hori eskaintzen duen lehen zerbitzu publikoa izango da. Unitateak 61,4 milioi euroko inbertsioa izango du, eta erreferentziazkoa izango da Onkologiaren arloan Euskadin eta Europan. Gipuzkoari, Bizkaiari, Arabari, Nafarroari, Iparraldeari, Errioxari eta Burgosko eta Soriako probintziei (Gaztela eta Leon) emango die asistentzia eta, aurreikuspenen arabera, 2027. urtearen amaieran artatuko dute lehen pazientea.

Ekipamendu teknologikoak

Azpiegituretan ez ezik, ekipamenduan ere inbertsio mardulak egingo ditu Jaurlaritzak. 192,6 milioi euro bideratuko dira, besteak beste, ordenagailu bidezko tomografo axialak, erresonantzia magnetikoak egiteko makinak, mamografoak, X izpien gelak eta hemodinamika eta angiografia gelak berritzeko. 

Horrek guztiak halabeharrez mantenimendu eta jasangarritasunean ere inbertsioa handitzea dakarrenez, 271,13 milioi bideratuko dira helburu horietara, alde batera utzi gabe digitalizaziorako martxan dagoen 100 milioi euroko inbertsio-lerroa, baliabide propioez eta Europako funtsez hornituta.