Bi dekretu adostu dituzte PSOEk eta Sumarrek, krisiari aurre egiteko neurriak eta etxebizitzaren ingurukoak jasotzeko

Espainiako Gobernuko kideen artean tentsio handiko orduak izan dira ostiral goizean, baina PSOEk eta Sumarrek desadostasunak gainditu dituzte eta Ministroen Kontseiluaren bilera akordioarekin amaitu dute azkenean. 

Irango gerrak sortutako krisiari aurre egiteko dekretua jorratzeko ezohiko Ministroen Kontseilua atzeratu egin da, Sumarreko kideek uko egin baitiote bilera gelan sartzeari, alokairuko kontratuen luzapena eta enpresen marjinak kontrolatzeko neurriak dekretutik kanpo uzten ziren bitartean. 

Ministroen Kontseilua 09:30ean zen hastekoa, baina bi ordu pasako atzerapenarekin hasi da azkenean. Tarte horretan, aurrez aurre aritu dira negoziatzen Pedro Sanchez Espainiako gobernuko presidentea eta Yolanda Diaz Sumarreko buru eta bigarren presidenteordea. Antza, elkarrizketa horiekin lortu dute azken orduetan tenkatutako negoziazioetan aurrera egitea. 

Azkenik, Sumarreko iturrien arabera, bi dekretu onartu dituzte: bata, erregaien, gasaren eta elektrizitatearen gaineko beherapenak eta neurri fiskalak jasoko dituena, Sumarrek eskatuta enpresen marjinak mugatzeaz gainera, eta, bestea, alokairuko kontratuen luzapena barne hartuko duena, negoziazioetan beste oztopo nagusia zena. 

Lehenengoan sartuko diren neurrien artean erregaien gaineko zerga % 10 jaistea dago, bai eta elektrizitatearen gaineko zergak murriztea eta baita beste neurri batzuk ere, hala nola bonu sozial elektrikoa handitzea.

Kontrolerako mekanismo bat ere jaso dute, Merkatuen eta Lehiaren Batzorde Nazionalaren (CNMC) bidez erregaien horniduran justifikaziorik gabeko marjinak saihesteko. Ministroen Kontseiluak mugak ezarri ahalko dizkio marjina horiei. Gainera, energia-iturrien hornidura etetea debekatzen du, hori ere Sumar koalizioko kideek eskatuta. 

Bigarren dektretuak Sumarrek eskatzen zituen etxebizitzari buruzko ekimenak jasotzen ditu, besteak beste aurten iraungitzen ziren 600.000 alokairuko kontratuak automatikoki luzatzeko. Hala ere, Sanchezek aurreratu duenez, gaur-gaurkoz ez dago dekretu hau baliozkotzeko gehiengorik Kongresuan. 

Sanchez: "Ezohiko egoerek ezohiko erantzunak eskatzen dituzte"

Pedro Sanchez Espainiako Gobernuko presidenteak gaur iragarri duenez, Irango gerrak izango duen eragin ekonomikoa arintzeko planak 80 neurri jaso eta 5.000 milioi euro mobilizatuko ditu "herritarrak babesteko, eta enpresa txiki eta ertainei, lehen sektoreari eta, jakina, industriari laguntzeko".

"Ezohiko egoerek ezohiko erantzunak eskatzen dituzte, eta hori da Ekialde  Hurbleko krisiari erantzuteko plan integral honek jasotzen duena", esan du Espainiako gobernuburuak komunikabideen aurrean, Ministro Kontseiluaren ostean egindako agerraldian.

Sanchezek ohartarazi duenez, Ekialde Hurbilean piztutako "legez kanpoko" gerra hori mundu mailako lurrikara ekonomiko baten lehen dardarak eragiten ari da eta herritarrak dira lurrikara hori sumatzen lehenak, esaterako autoa hartzen duen bakoitzean, erregaien prezioen igoera jasaten hasiak baitira, horren hitzetan. 

"Inork ez daki norantza doan egoera eta nola eboluzionatuko duen krisiak. Ez dakigu gatazka honek zenbat iraungo duen, egunak, hilabeteak edo urteak izango diren. Eraginen neurriaren arabera, ondorioei eutsi ahal izango zaie edo krisi larri bilaka litezke", adierazi du.

Sumar, pozik

Sumarrek esan du pozik daudela eskatzen zituzten hainbat neurri sartu dituztelako, batez ere enpresen marjinen kontrola eta alokairuen luzapena; izan ere, gaur goizean Kontseilua egin aurretik mahai gainean zegoena zergak jaisteko dekretu hutsa zen. "Orain oso bestelakoa da egoera", esan dute, pozik.

Monica Garcia Osasun ministroak iragarri du Ministroen Kontseiluan "alokairuen luzapena eta enpresen marjinen kontrola gehituz ezkutu soziala handitzeko" adostasuna lortu dutela.

"Gerra bidegabe eta immorala honen ondorioak arintzeko laguntzez gain, indarrean izango dira maizterren babeserako neurriak eta espekulazioa bloketzeko neurriak, prezioen marjinena kasu", gaineratu du.