Flotillako kideen aurka Ertzaintzak izandako jarrera salatu dute EH Bilduk, Sumarrek eta Euskadiko Podemosek

EH Bilduk, Sumar Mugimenduak eta Euskadiko Podemosek gogor salatu dute "Ertzaintzak Global Sumud Flotillako kideen eta haiei elkartasuna agertzera Loiuko aireportura joandako herritarren aurka gogor oldartu izana". Era berean, elkartasun osoa agertu diete Palestinaren aldeko ekintzaileei.

"Elkartasunaren eta giza eskubideen defentsaren ikur den flotillaren aurkako bortizkeriak ez du inolako justifikaziorik", dio koalizio subiranistak komunikabideetara bidalitako oharrean, eta "Isralek bahitutako pertsonak Euskal Herrira ailegatzean kolpatu eta atxilotzea ez da onargarria", erantsi dute.

Halaber, atxilotuak berehala askatzeko eta "elkartasun ekintzen aurkako oldarraldiarekin amaitzeko" eskatu du EH Bilduk. 

Bestalde, gertakari horien erantzuleek "beharrezko azalpenak emateko eta erantzukizunak hartzeko" eskatu du, eta Eusko Legebiltzarrean Bingen Zupiria Segurtasun sailburuaren premiazko agerraldia eskatuko dutela iragarri du.

Hain zuzen ere, handik ordu batzuetara, Zupiriak berak agerraldia iragarri du astearterako.

Segurtasun Sailak jakitera eman duenez, Ertzaintzak barne ikerketa abiatu du gertatutakoak indarrean dituzten arauak betetzen dituen ala ez argitzeko.

"Onartezina da", salatu du Sumar Mugimenduak

Sumarrek ere irmo salatu du Ertzaintzaren "jarduera errepresiboa". Ohar batean adierazi duenez, "onartezina da Israelgo Estatu genozidak jazarri, atxiki eta bortxatutako pertsonak kargekin, identifikazioekin eta atxiloketekin hartzea Euskadin, Israelgo indarren indarkeria, askatasun-gabetzea eta eskubide-urraketak jasan ondoren itzuli berri zirenei ongi-etorria egin behar zietenean".

Atxilotuak berehala askatzea, edozein zigor kentzea eta "erantzukizun politiko eta polizialak azken ondorioetaraino argitzea" eskatu du Sumar Mugimenduak.

Bingen Zupiria Eusko Jaurlaritzako Segurtasun sailburuaren agerraldia eskatu du Sumarrek ere, eta ikerketa sakona eta independentea eskatu du, "Palestinarekiko elkartasuna kolpatzea ezin delako zigorrik gabe geratu".

Mugimenduaren ustez, Ertzaintzak berak iragarritako barne ikerketa "ezin da itxiera korporatiborako mekanismo bihurtu, ezta larritasun demokratiko handiko gertakarien aurrean erantzukizunak desegiteko bide ere".

Podemosek era gogor salatu du gertatua

Podemos Euskadik ere gogor salatu du Ertzaintzak Loiuko aireportuan izandako jokabidea.

Hedabideetara igorritako ohar batean alderdi moreak salatu duenez, "erabat onartezina da giza eskubideak defendatzen dituzten ekintzaileen aurka erabilitako indarkeria". "Elkartasun internazionalistaren aurrean euskal erakundeen erantzuna ezin da, inolaz ere, makila eta errepresioa izan", gaineratu du.

Podemos Euskadik ere gertatutakoaren inguruko azalpen "urgenteak eta gardenak" eskatu dizkio Bingen Zupiria Eusko Jaurlaritzako Segurtasun sailburuari.

Ertzaintzako sindikatuen erreakzioak

ESAN sindikatu polizialarentzat, Ertzaintzako bigarrena ordezkaritan, "kolektibo jakin batzuek eta haien ingurukoek Ertzaintzarekin liskarra bilatu dute", larunbat honetan Global Sumud Flotillako ekintzaileak Loiuko aireportura iritsi direnean.

ESAN sindikatuak ohar batean adierazi duenez, "Ertzaintzak profesionaltasunez, neurriz eta tinko jokatu du tentsioa, zarata eta ikuskizuna besterik nahi ez dutenen aurrean".

Ertzaintzaren Sindikatu Profesionalak, SiPEk, ere Ertzaintzaren jarduera babestu du, eta gertatua "zorroztasunez" aztertzeko eskatu du, "eta ez sare sozialetan zabaldutako bideo partzialen bidez".

Ohar batean, kritikatu egin du "sektore politiko eta sozial batzuek, beste behin ere, poliziaren jarduera konplexu bat Ertzaintzako profesionalen aurkako desprestigio-kanpaina bihurtzeko ahalegina", "sare sozialetan zabaldutako bideo partzial eta testuingurutik kanpokoak" erabiliz, "agenteen aurkako berehalako gaitzespen publikoa sortzeko", euren iritziz.