Udako TAO denboraldia ekainaren 1ean hasiko da EAEko kostaldeko herri gehienetan

Astelehenean, ekainak 1, hasiko da hondartza denboraldia Bizkaiko eta Gipuzkoako kostaldeko udalerri gehienetan, eta, horrekin batera, aparkaldi arautuaren udako tarifak sartuko dira indarrean.

Hona hemen hondartza eremuetan araututako aparkalekuen datak, ordutegiak eta xehetasunak.

Bizkaia

Getxo: TAOa astelehenean sartuko da indarrean Ereaga hondartzaren inguruan eta Portu Zaharrean (5 gunea), hondartza denboraldiaren hasierarekin batera. TAOa ekainaren 1etik irailaren 30era arte egongo da martxan eremu horietan, eta 10:00etatik 20:00etara izango da indarrean, etenik gabe, astelehenetik igandera, jaiegunak barne.

Gorliz: Ekainaren 15era arte eta irailaren 15etik urriaren 15era bitartean, TAOa aktibo egongo da asteburuetan. Egun horietatik kanpo, uda sasoian, asteko egun guztietan egongo da indarrean 10:00etatik 20:00etara. Gune urdinean etena izango du 14:00etatik 15:30era. Berritasun nagusia gune arrosa izango da, non egoiliarrek bakarrik aparkatu ahal izango duten; izan ere, udan, egun jendetsuetan, bisitariak iristen direnean, aparkatzeko lekurik gabe geratzen dira. Egoiliarrek doan eta denbora-mugarik gabe aparkatu ahal izango dute.

Plentzia: Disuasio-aparkalekua egokituko da berriro metroaren ondoan. Garraio publikoa sustatzeko neurria da, eta eremu horretan gehienez ere 9 orduz utzi ahal izango da ibilgailua.

Sopela: Ekainaren 1ean jarriko da indarrean TAO zerbitzua, astelehenetik igandera, 10:00etatik 20:00etara. Berrikuntza nagusietako bat mugikortasun urriko pertsonentzako erregimena hobetzea izango da; izan ere, aurreko funtzionamenduaren arabera, erreserbatutako plaza guztiak beteta egotea baldintza zen erreserbatu gabeko plazetan aparkatu ahal izateko. Muga hori desagertu egin da orain, eta mugikortasun murriztuko txartela duten pertsonek erreserbatu gabeko plazetan aparkatu ahal izango dute, besterik gabe. Aparkatzeko abonuei dagokienez, bigarren egoitzen kasuan, etxebizitza bakoitzeko bi abonu onartuko dira, eta surfa eta parapentea praktikatzeko, abonua eskatu ahal izango da. 

Lemoiz: Ekainean eta irailean, 15:30etik 20:00etara egongo da indarrean lanegunetan, eta 12:00etatik 20:00etara larunbat, igande eta jaiegunetan. Uztailean eta abuztuan, egunero egongo da martxan 12:00etatik 20:00etara. 

Mendexa: Karraspioko aparkalekuan, ekainaren 1ean sartuko da indarrean irailaren 30era arte, eta 10:00etatik 20:00etara egongo da martxan.

Mundaka: Ez da TAOrik egongo, baina plazen % 45 bizilagunentzat gordeko dira.

Muskiz, Zierbena eta Urdaibaiko hondartzetan (Arena, Laga eta Laida) ez da TAOrik egongo.

Gipuzkoa

Donostia: Udako aparkaleku denboraldia ekainaren 1ean jarriko da indarrean, gune gorri, urdin eta berdeekin, denbora-muga desberdinekin; eremu asko egongo dira 9 ordura arteko mugarekin, erdigunetik eta hondartzetatik urrunago dauden eremuetan, baina hiriko autobus lineak esku-eskura dituztela.

Hondarribia: TAO egongo da martxan portuaren inguruan: eremu urdina (10:00etatik 20:00etara, gehienez 4 ordu), gorria (10:00etatik 20:00etara, gehienez 1 ordu) eta berdea (10:00etatik 20:00etara, egoiliarrentzat). Hondartza inguruan, gune urdinean aparkatze mugatua ekainaren 1etik irailaren 15era arte egongo da indarrean, astelehenetik igandera eta 10:00etatik 20:00etara (gehienez 10 ordu). Gainera, aparkaleku itxi bat egongo da, ekainaren 1etik irailaren 15era arte, denbora mugarik gabe, irtetean ordaindu beharrekoa. Mugikortasun urriko pertsonentzako bereizgarria duten ibilgailuek doan aparkatu ahal izango dute, udaleko erregistro orokorrean aldez aurretik eskatuta. Mendelu inguruan, aparkalekua doakoa izango da, baina makinetan tiketa atera beharko da, eta auto barruan ikusgai utzi. Denbora-muga 4 ordukoa izango da, txandakatzea errazteko.

Orio: Hondartza gunean, Abaromendin, autobidearen azpian eta Munton, ordainpeko aparkalekuak egongo dira, egunero, 10:00etatik 20:00etara eta denbora mugarik gabe.

Zarautz: Tarifa murriztuko aparkalekuak prestatu dira Kortazar, Mitxelena, Hegoalde eta Itxas Mendin, egonaldi luzeko tarifekin (4 ordu baino gehiago edo egun oso bat 10 € inguru). Uda osoan zehar, aurreko urteetan bezala, autobusak egongo dira Astitik (autobideko zubiaren azpian) erdigunera eta hondartza gunera hurbiltzeko.

Getaria: Aparkatzeko gune urdin arautua egongo da egunero, 10:00etatik 20:00etara (gehienez 10 ordu, 12 €-ren truke).

Deba: TAO zerbitzua egunero egongo da indarrean ekainaren 1etik irailaren 30era. Egoiliarrek edo udatiarrek txartel bereziak izango dituzte, udaletxean aldez aurretik eskatuta. Artzabalgo aparkalekua, TAOrik gabeko eremua izango da, eta tarifa bakarra izango da eguno osorako, 2,5 €-koa. 

Araba

Araban doako aparkalekua egongo da Landan eta Garaion.

Garaioaren kasuan, autobus-linea martxan egongo da Gasteiztik (4. linea), eta Landaren, Uribarriren eta Arroiaberen kasuan, DG05D linea erabili beharko da.