BGAEk uste dute ezinbestekoa dela pentsio pribatuak sustatzea
Euskadiko Borondatezko Gizarte Aurreikuspeneko Erakundeak (BGAE) alderdi politikoekin bilduko da hauteskundeen aurretik pentsio pribatuei buruz kontzientziazio soziala sustatu dezaten, haien ustetan dagoeneko aurrezki bat izateari utzi eta "beharrizan bat" bihurtu baitira.
Euskadiko BGAEen presidente Ignacio Etxebarriak agerraldia egin du hedabideen aurrean Bilbon erakunde horien balantzea aurkezteko. Gauzak horrela, 2015ean, aurreko ekitaldiarekin alderatuta, beren ondarea 332 milioi euroan (% 1,48) areagotu zutela jakinarazi du, 22.500 milioien langa gaindituta.
Hala ere, jaitsiera txiki bat jasan dute kuotei (740 milioi, % 1,24 gutxiago) eta bazkideei (% 3,5 gutxiago) dagokienez. Euren kalkuluen arabera, lan egiten duen euskal populazioaren ia erdiak (% 49,32) BGAE bat dauka kontratatuta.
Haien iritziz, erretirodunen oinarrizko diru-sarrerak "pentsioen sistema publikotik" etortzen jarraituko dute hein handi batean, baina egungoak baino baxuagoak izango dira; horrenbestez, instituzioei eta gizarte agenteei eskatu diete diru-sarrera horiek BGAEkin osatzeko beharrizanaz kontzientziatzen saia daitezela.
Hala, Euskadiko BGAEk euren kezkak helarazi nahi dizkiete alderdi politiko nagusiei (EAJ, EH Bildu, PP, PSE, Podemos), hurrengo hauteskunde autonomikoak egin aurretik.
Etxebarriak esandakoaren arabera, egun, Euskadin, 894.000 kotizatzaile aktibo daude eta 534.618 erretirodun pasibo, baina kopuru horiek berdinduz joango dira, gero eta erretirodun gehiago eta aktibo gutxiago egongo baitira.
Aurreko urteko emaitzei dagokienez, BGAEn ondareak jada Euskadiko barne-produktu gordinaren % 34 dira. Datu horrek Espainiakoa (% 9,5) laukoizten du, baina oraindik ere aldenduta dago herrialde garatuenetan dituzten datuetatik edo Ekonomia Lankidetza eta Garapenerako Erakundeko (OECD) bataz bestekotik (% 84).
Zure interesekoa izan daiteke
Anthropic Burtsara aterako da gaur eta historiako burtsaratze handiena izango da: 85.670 milioi eurotik gora
LABek bertan behera utzi ditu Nafarroako ikuskizunen sektoreko bi greba egunak, negoziazioari berriro ekin ondoren
Gabonetako erosketen ondorioz, abenduan ohi baino % 23 gehiago gastatuko dute familiek
Itoiztik Erriberara: 354 milioi euro Nafarroako ubidearen proiekturako
Espainiako Gobernuak soldaten sekretuarekin amaitu du
Eusko Jaurlaritzak aurrekontuen negoziazioa amaitutzat eman du, oposizioarekin akordiorik lortu gabe
Aurtengo iraila azken hamar urteetako onena izan da esportazioei dagokienez, Jaurlaritzaren arabera
Adifen arabera, grebak % 6,04ko eragina izan du Euskadin goizeko txandan, eta % 15,56koa gauekoan