5.105 langabe gutxiago zenbatu dituzte ekainean EAEn eta Nafarroan
5.105 langabe gutxiago zenbatu dituzte ekainean Euskal Autonomia Erkidegoan (EAE) eta Nafarroan ekainean. Bosgarren hilabetez behera egin du langabeziak, hortaz, eta 184.083 pertsona daude lan barik Hego Euskal Herrian.
Espainiako Enplegu eta Gizarte Segurantzako Ministerioak ekainari dagozkion datuak eman ditu gaur. 2015eko ekaineko datuekin alderatuta, 15.733 pertsona gutxiago daude lan barik.
Lurraldeka, Gipuzkoan jaitsi da gehien langabezia 2015eko ekainarekin alderatuta. % 9,44 jaitsi da tasa, eta iaz baino 4.075 langabe gutxiago zenbatu dituzte. Segidan Araba eta Nafarroa agertzen dira portzentaje beherakada handienarekin: % 8,16 eta % 7,58 %, hurrenez hurren (2.104 eta 3.253 langabe gutxiago). Bizkaia da zerrendan azkena, % 7,16ko beherakadarekin (6.301 pertsona gutxiago Lanbideko bulegoetan izena emanda), betiere iazko datuekin alderatuta.
Ekainean lan gabe zeuden 184.083 pertsonetatik 12.174k 25 urte baino gutxiago zuten.
Estatuko datuei erreparatuta, langabe kopuruak behera egin du han ere, eta 124.349 langabe gutxiago zenbatu dituzte. Guztira, 3.767.054 pertsona daude langabezian, 2009ko irailetik zenbatutako kopururik txikiena. Izan ere, langabezia datuak ematen direnetik ekainean izandako beherakada handienetakoa izan da honakoa; handiena, duela hiru urte izan zen, orduan 127.248 langabe gutxiago zenbatu zituzten eta.
Gizarte Segurantzako afiliazioa
Gizarte Segurantzako afiliazioari dagokionez, gora egin du EAEn, eta ekainean 913.322 pertsona zeuden izena emanda, maiatzean baino 928 langile gehiago eta iazko ekainean baino 17.708 gehiago (%1,98), Ministerioaren arabera.
Nafarroan ere igo egin da afiliazioa: iazko hilabete berean baino 7.366 afiliatu gehiago zenbatu dituzte, % 2,86ko hazkundea, alegia.
Estutuan % 0,56 igo da afiliazioa maiatzeko datuekin alderatuta, eta % 2,92 iazkoekin erkatuta. Guztira, 17.760.271 langile daude Gizarte Segurantzan afiliatuta.
Gobernuen eta sindikatuen balorazioa
EAEn langabezia tasa jaitsi izana euskal lan merkatuaren "susperraldiaren seinale" da, Eusko Jaurlaritzaren hitzetan. Dena dela, joera hori alor eta sektore guztietan "berdina" ez dela deitoratu du, edota sinatutako kontratuen % 7,4 bakarrik direla mugagabeak.
Jaurlaritzak nabarmendu duenez, langabezian urtebete baino gehiago daramatenek eta 54 urte gorakoek dituzte zailtasun gehien lana topatzeko.
Nafarroako Gobernua ere pozik agertu da langabeziaren jaitsierarekin. Uxue Barkos Nafarroako presidenteak azpimarratu duenez, dena den, "datuak ez dira guk nahiko genituenak", eta "erne jarraitzeko" deia egin du.
Barkosen aburuz, ekaineko datuek "bide ona" adierazten dute, eta, beraz, "bide horretan lan egiten jarraitu behar dugu".
Sindikatuak kritikoago azaldu dira, eta prekarietatea, enpleguaren behin-behinekotasuna, eta langabeak "babesgabe" daudela salatu dute.
ELA sindikatuaren iritzian, gobernuek "lan barik dauden pertsonak abandonatu dituzte". ELAk emandako datuen arabera, langabeen % 62,4k ez dute langabezia-saririk jasotzen.
UGT-Euskadik nabarmendu duenez, bestalde, gaur egungo enplegua "aldi baterako kontratazio prekarioa oinarri duen eredu batean oinarritzen da eta iraunkor egiten ari da".
Zure interesekoa izan daiteke
Ikuskizunetako teknikarien grebaren deitzaileak pozik agertu dira lanuzteak izan duen jarraipenarekin
Teknikariok, ESK, LAB, UGT, CCOO, ELA eta CNT Euskal Autonomia Erkidegoko ikuskizunen lehen hitzarmena negoziatzen ari dira, eta patronalari eskatu diote elkarrizketei berriro ekiteko, urtebete baitaramate blokeatuta. Aldi baterako kontratuak, lanaldi oso luzeak, legez ezarritako atsedenaldiak ez errespetatzea, jaiegunetan zein gaueko ordutegian plusik ez jasotzea eta lana eta bizitza pertsonala uztartzeko zailtasunak dituztela salatzen dute.
Langabeziak gora egin du uztailean Euskadin eta Nafarroan: 1.378 eta 534 langabe gehiago dago, hurrenez hurren
Euskadin uztailean 105.590 enplegu-eskatzaile egon dira, ekainean baino 1.378 gehiago. Nafarroan, berriz, 534 langabe gehiago izan dira, 28.843. Eusko Jaurlaritzaren arabera, datu hori hainbat langile lan-merkatuan sartzearekin lotuta dago.
Bizkaiko Golkoa eta Frantzia lotuko dituen goi tentsioko linearako kablea jartzen hasi dira, Lemoiz parean
Bizkaiko Golkoaren eta Frantziaren arteko interkonexio elektrikoa gertuago dago. Goi tentsioko linea honek Gatika eta Bordeletik gertu dagoen Cubnezais batuko ditu eta 276 kilometroko tartea egingo du ur azpian. Ekosistemari kalterik egingo ez zaiola ziurtatzeko, Aztik gainbegiratuko ditu lanak.
Ikuskizunetako teknikariek "enpatia" eskatu diete artistei hiriburuetako jaietan deitutako greban
EAEko lehen lan-hitzarmena negoziatzen ari diren sindikatuek lanuzteak deitu dituzte abuztuaren 5, 14 eta 26rako, lan-hobekuntzak eskatzeko eta patronalari negoziazioei berriro ekiteko eskatzeko.
Euriborrak % 2,855ean itxi du uztaila, mailarik altuena 2024ko irailetik
Ekainarekin alderatuta, tasa oinarrizko 6 puntu igo da.
Euroguneko inflazioa % 2,9an kokatu da uztailean, hamarren bat igota
Eurostatek argitaratu berri duen urte arteko tasa % 3,8koa da Espainian, ekainekoa baino bi hamarren handiagoa, eta % 2,4koa Frantzian, joan den hilean baino lau hamarren handiagoa. Energiaren esparruan igo da gehien inflazioa.
Gipuzkoako Moeve gasolindegietako langileek greba ziklo bati ekin diote, lan-baldintzak hobetzeko asmoz
Lehenengo lanuztea ostegunean hasi zen, 22:00etan, eta igandean amaituko da. Mobilizazioen artean, gaur elkarretaratzea egin dute AP-8 autobidearen Oiartzungo gasolindegian.
Gasolina eta gasolioa 6 zentimo baino gehiago garestitu dira litroko, Hidrokarburoen Zerga Bereziaren igoeraren ondorioz
Batez beste, gasolina depositua betetzeak duela urtebete baino 8,5 euro gehiago balio du, eta gasolio deposituak ia 16 euro gehiago, abuztuko irteera-operazio betean.
38 urteko langile bat oso larri zauritu da Alesbeseko kontserba-enpresa batean izandako istripuan
Foru Gobernuak zabaldutako oharraren arabera, langileari ur irakina erori zaio gainera, eta erredurak ditu gorputzaren % 80an.
Bazka erosketa bateratua aztertuko du Euskadik, lehorteak eragindako larre-eskasia dela eta
ENBA sindikatuaren eta UAGA Arabako nekazarien elkartearen ordezkariak Eusko Jaurlaritzarekin bildu dira Lakuan, beroak eta euri faltak lehen sektorean eragindako kalteak aztertzeko.