Udazkenean hasiko dituzte Donostiako topoa eraikitzeko lanak

Euskotrenen Lasarte-Oria/Donostia/Hendaia linearen trenbidea, Donostiako topoa, eraikitzeko lanak "udazken honetan" abiatuko dituzte, Arantza Tapia Eusko Jaurlaritzako Ekonomiaren Garapen eta Azpiegitura sailburuak iragarri duenez.

Tapiaz gain, Markel Olano Gipuzkoako ahaldun nagusiak eta Eneko Goia Donostiako alkateak proiektuaren ezaugarriak aurkeztu dituzte Donostian, Easo kaleko Euskotren geltokian. Kanpoaldean, hogei bat pertsona bildu dira protesta egiteko.

Lugaritz eta Morlans lotuko dituen trenbide berria 4,2 kilometro luze izango dela azaldu du sailburuak, lur azpiko hiru geltoki izango dituela azpimarratzeaz gain: Bentaberri, Kontxa eta Easo. Bi zatitan egingo dutela gaineratu du, 150 milioi euroko aurrekontuarekin.

Lehenik eta behin, Lugaritz eta Mirakontxa artean dauden 2,1 kilometroak eraikiko dituzte. 50 milioi euroko aurrekontua du zati honek eta 48 hilabeteko epea aurreikusi dute. "Urrian hasi eta 2021ean bukatzea" espero dute.

Bi bideko tunela eraikiko dute, eta bi sarbide izango dituen lur azpiko geltokia egongo da Bentaberrin: Xalbador Bertsolaria eta Pedro Manuel Ugartemendia kaleek bat egiten duten tokian egingo dute sarbide bat, eta Bentaberri plazan, bestea. Horrez gain, igogailua eraikiko dute Zarautz etorbideko 35. zenbakiaren parean.

Bigarren fasea

Ondoren, Mirakontxa eta Easo lotuko dituen zatiak ere 48 hilabeteko epea eta 70 milioi euroko inbertsioa izango du. 2022ko urtarrilean amaituta izatea espero dute.

Olanoren iritziz, proiektua "beharrezkoa da lurraldearentzat", Donostian eraiki arren, "Gipuzkoa osoko hiritarrei eskainiko dielako zerbitzua" eta "hiritarren bizi kalitatea hobetuko" duelako.

Eneko Goia Donostiako alkateak, bestalde, "hiriarentzat oso albiste ona" dela nabarmendu du.