Espainiak % 2,1era murriztu du 2019rako hazkunde-ekonomikoaren aurreikuspena

Espainiako Gobernuak % 2,1era murriztu du 2019rako hazkunde ekonomikoaren aurreikuspena, eta % 1,8ra 2020koa. Bi kasuetan, aurreikusita zegoenarekin alderatuta, hazkundea hamarren bat txikiagoa izango da, Europar Batzordeari astearte honetan helarazitako koadro makroekonomikoa aztertuta ondoriozta daitekeenez.

Ekonomia eta Enpresa Ministerioaren arabera, aldaketa horren arrazoia da, ia erabat, Urteroko Kontabilitate Nazionalaren Estatistikako Institutu Nazionalak egindako berrikuste estatistikoa. Berrikuste horregatik, Barne Produktu Gordinaren hazkundearen 2016-2018rako aurreikuspena murriztu egin da.

Espainian, enpleguak % 2,3 egingo du gora 2019an, eta % 2, berriz, 2020an; hala, langabezia-tasa % 13,8ra jaitsiko da aurten, eta % 12,3ra 2020an.

Aurrekontu-planak defizita murrizteko konpromisoa jasotzen du. 2019rako, Barne Produktu Gordinaren % 2an kokatuko da, eta 2020rako, aldiz, bi hamarren jaitsi eta % 1,7an utzi du. Nolanahi ere, Gobernuaren arabera, aurreikuspen hori "zerga-izaerako neurri osagarririk kontuan izan gabeko egoera inertzial batean" oinarritzen da.

Planaren arabera, pentsioen balioa % 0,9ra handituko da, 2020rako, pentsiodunen erosteko ahalmenari eusteko; halaber, sindikatuekin adostutako % 2ko igoerari eutsiko diote, funtzionarioei soldata igotzea xede.  

Hazkunde ekonomikoaren aurreikuspenetan murrizketa egonda ere, Espainiako Gobernuak bi hamarren hobetu du lanaldi osoko enpleguaren hazkundearen kalkulua: 2019an, % 2,3 egingo du gora (% 2,1 igotzea aurreikusi zuten), eta % 2 haziko da 2020an (% 1,8 egin behar zuen gora, aurreikuspenen arabera). Langabezia-tasak aurreikusitakoari eutsiko dio: % 13,8koa izango da 2019an, eta % 12,3koa 2020an.

Espainiako Gobernuak nabarmendu duenez, Zerga Ardurako Aginte Independenteak abala eman die aurreikuspen makroekonomiko horiei.

Espainiako ekonomiaren "sendotasuna"

Ekonomia eta Ogasun Ministerioek agiri bateratu baten bidez azpimarratu dute koadro makroekonomiko berri honek "Espainiako ekonomiaren sendotasuna" islatzen duela: "Ekonomia kanpoko alderdi batzuen eraginez moteldu bada ere, eta nazioartean ziurgabetasuna nagusi den arren, Espainia euro-gunean batez beste izaten ari den hazkundea gainditzen ari da, eta, gainera, hobeto egiten du, defizit publikoa eta zor publikoa murrizten jarraitzen duelako".

Hazkundearen osaerari dagokionez, Espainiako Gobernuaren kalkulua da barne-eskariak 1,5 puntu ekartzea Barne Produktu Gordinari 2019an, eta 1,6 puntu 2020an; kanpo-eskariak, aldiz, hobetu egingo du bere ekarpena: aurten 0,6koa izango da, eta 0,2koa hurrengoan.

Horrek isla izango du kontu korronteagatik egindako ordainketa-balantzan; BPGaren % 1,8an eta % 1,6an kokatuko da 2019an eta 2020an, hurrenez hurren. Hortaz, Espainiako ekonomiaren finantziazio-ahalmena BPGaren % 2tik gora kokatuko da aurten eta datorren urtean.

Espainiako Gobernuak aurreikusten du diru-sarrera publikoak Barne Produktu Gordinaren % 39,6koak izatea 2020an, eta 512.032 milioi euroraino iristea. Politika iraunkorrak egonez gero, zergazko diru-sarrerak % 4,8ra igoko lirateke, kalkuluen arabera.

Funtsezko aurrekontu-saldoari dagokionez (hau da, zorraren interesik gabeko saldoari dagokionez), aurreikuspena da 2020an % 0,4koa izatea, 2019ko datua bikoiztuta. Espainiako Gobernuaren esanetan, horrek aukera emango dio "zor publikoa murrizten jarraitzeko".